ن لیگ کی پالیسی کسی بھی مذہبی و سیاسی جماعت پر پابندی لگانے کی نہیں، رانا ثنا اللہ

وزیراعظم کے مشیر برائے سیاسی امور سینیٹر رانا ثنا اللہ نے کہا ہے کہ پاکستان مسلم لیگ (ن) کی پالیسی کسی بھی سیاسی یا مذہبی جماعت پر پابندی عائد کرنے کی نہیں ہے۔

لاہور میں میڈیا سے گفتگو کرتے ہوئے رانا ثنا اللہ نے کہا کہ ن لیگ ہمیشہ سے سیاسی اختلاف کے باوجود مکالمے اور جمہوری عمل پر یقین رکھتی ہے، تاہم بعض جماعتوں کی جانب سے پُرتشدد احتجاج کے واقعات افسوسناک ہیں۔

ان کا کہنا تھا کہ تحریک لبیک پاکستان (ٹی ایل پی) سے متعلق پنجاب حکومت نے اپنا مؤقف وفاق کو بھیج دیا ہے اور حتمی فیصلہ وفاقی حکومت کرے گی، مگر (ن) لیگ اصولی طور پر کسی بھی جماعت پر پابندی کے حق میں نہیں۔

رانا ثنا اللہ نے کہا کہ سیاسی جماعتوں کا کام عوامی خدمت اور جمہوری عمل کو آگے بڑھانا ہے، تصادم یا تشدد نہیں۔