نو مئی پر ریلی نکالنے کے دوران گرفتار پی ٹی آئی کے کارکنان کو عدالت نے رہا کردیا

راولپنڈی میں نو مئی کا ایک سال مکمل ہونے پر پُرامن ریلی نکالنے کے دوران گرفتار ہونے والے پی ٹی آئی رہنماؤں اور کارکنوں کی عدالت نے ضمانت منظور کرتے ہوئے انہیں رہا کرنے کا حکم دے دیا۔

تفصیلات کے مطابق پولیس نے نو مئی ریلی نکالنے کے دوران پی ٹی آئی کے سابق امیدوار شہریار ریاض سمیت متعدد امیدواروں کو دفعہ 144 کی خلاف ورزی پر گرفتار کیا تھا اور پھر انہیں آج عدالت میں پیش کیا گیا۔

پولیس کی جانب سے ملزمان کے جسمانی ریمانڈ کی استدعا کی گئی جسے سیشن کورٹ کے جج نے مسترد کر کے ملزمان کی ضمانت منظور کی۔

پولیس کے مطابق تھانہ بنی پولیس نے دفعہ 144 کی خلاف ورزی اور حکومت کے خلاف نعرہ بازی پر ان پر مقدمہ درج کیا گیا ہے۔ سول جج نواز اشرف نے شہریار ریاض، سیمابیہ طاہر سمیت تمام گرفتار شدگان کی ضمانتیں منظور کرلیں اور قائدین اور کارکنان کو پچاس پچاس ہزار روپے مچلکے جمع کرانے کا حکم دیتے ہوئے انہیں رہا کرنے کی ہدایت کی۔

عدالت نے کہا کہ آئین و قانون کے تحت پُرامن احتجاج ہر پاکستانی شہری کا بنیادی حق ہے لہذا ریمانڈ کی استدعا مسترد کی جاتی ہے۔ عدالت نے کمرے میں ہی تمام ملزمان کی ہتھکڑیاں کھلوا کر انہیں رہا کیا جس کے بعد تمام رہائی پانے والے کارکنان نے بانی پی ٹی آئی کے حق میں نعرے بازی بھی کی۔