پاک ایران زمینی راستے سے تجارت بحال، پہلی برآمدی کھیپ وسطی ایشیا روانہ

پاک ایران ٹرانزٹ کوریڈور کے تحت زمینی تجارت کا باقاعدہ آغاز ہو گیا ہے اور پہلی برآمدی کھیپ وسطی ایشیا کے لیے روانہ کر دی گئی ہے۔

حکام کے مطابق یہ کھیپ ریفریجریٹڈ ٹرکوں کے ذریعے ازبکستان کے دارالحکومت تاشقند بھیجی گئی ہے، جس میں منجمد گوشت شامل ہے۔ اس پیش رفت کو خطے میں تجارتی روابط کے فروغ کے لیے اہم قدم قرار دیا جا رہا ہے۔

متعلقہ حکام کا کہنا ہے کہ اس کوریڈور کے ذریعے پاکستان سے سامان گوادر کے راستے ایران سے گزرتے ہوئے وسطی ایشیائی ممالک تک پہنچایا جائے گا، جس سے نہ صرف تجارتی سرگرمیوں میں اضافہ ہوگا بلکہ ملکی معیشت کو بھی فائدہ پہنچنے کی توقع ہے۔

ان کے مطابق اس نئے روٹ کے فعال ہونے سے پاکستانی بندرگاہوں پر کاروباری سرگرمیاں بڑھیں گی اور خطے میں پاکستان کی تجارتی اہمیت مزید مضبوط ہو گی۔