پاکستانی افواج کی غزہ میں تعیناتی امن کے لیے خوش آئند ہوگی، رانا ثنا اللہ

وزیرِ اعظم شہباز شریف کے معاونِ خصوصی رانا ثنا اللہ نے کہا ہے کہ اگر غزہ میں امن قائم کرنے کے لیے پاکستانی افواج کو کردار ادا کرنے کا موقع ملے تو اس سے بہتر کوئی بات نہیں ہو سکتی۔

نجی ٹی وی اے آر وائی نیوز کے ایک پروگرام میں گفتگو کرتے ہوئے رانا ثنا اللہ سے ٹائمز آف اسرائیل کی ایک خبر کے حوالے سے سوال کیا گیا کہ کیا پاکستان کو غزہ امن منصوبے کے تحت بنائی جانے والی انٹرنیشنل اسٹیبلائزیشن فورس (ISF) میں شامل کیا جا رہا ہے؟

اس پر رانا ثنا اللہ نے کہا، "اگر وہاں امن کے قیام کے لیے پاکستان کی افواج کو موقع ملتا ہے تو یہ انتہائی خوش آئند بات ہوگی۔"

ان کا کہنا تھا کہ اگر پاکستان کو فلسطینی عوام کی مدد، ان کی جانیں بچانے اور امن قائم کرنے کے لیے کوئی کردار ادا کرنے کا موقع ملتا ہے، تو یہ ملک کے لیے ایک باعثِ فخر سعادت ہوگی۔

انہوں نے وضاحت کی کہ یہ ان کی ذاتی رائے ہے اور فی الحال انہیں اس بارے میں کوئی سرکاری اطلاع نہیں کہ پاکستان کو ایسی کوئی پیشکش موصول ہوئی ہے۔

رانا ثنا اللہ نے مزید کہا کہ پاکستان ان آٹھ ممالک میں شامل ہے جو اس بات پر متفق ہیں کہ غزہ میں امن کے لیے ایک بین الاقوامی فورس تعینات کی جانی چاہیے، تاکہ اسرائیلی افواج کا انخلا یقینی بنایا جا سکے۔

خیال رہے کہ سابق امریکی صدر ڈونلڈ ٹرمپ کے 20 نکاتی امن منصوبے کے تحت امریکہ اپنے عرب اور بین الاقوامی اتحادیوں کے ساتھ مل کر غزہ میں فوری تعیناتی کے لیے ایک عارضی انٹرنیشنل اسٹیبلائزیشن فورس (ISF) تشکیل دینے کا ارادہ رکھتا ہے، جو فلسطینی پولیس فورسز کو تربیت اور تکنیکی مدد فراہم کرے گی۔