پی آئی اے کا لندن کے لیے براہِ راست پروازوں کا آغاز

کراچی : پی آئی اے مارچ 2026 سے اسلام آباد اور لندن کے درمیان براہِ راست پروازوں کا آغاز کرنے جا رہی ہے، ترجمان کے مطابق لندن کے لیے براہِ راست پروازوں کا آغاز پاکستانیوں، بالخصوص برطانیہ کے شہر لندن میں مقیم بڑی تعداد میں تارکینِ وطن کے دیرینہ مطالبے کی تکمیل ہے۔

اس اقدام کے بعد مسافر اب اسلام آباد اور لندن کے درمیان بغیر کسی اسٹاپ اوور اور ائیرپورٹس پر طویل انتظار کے براہِ راست سفر کر سکیں گے۔

ندن کے لیے پروازوں کی بحالی تقریبا چھ سال کے طویل وقفے کے بعد عمل میں آ رہی ہے۔ پی آئی اے کی پہلی پرواز 29 مارچ 2026 کو اسلام آباد سے لندن کے لیے روانہ ہوگی۔

ابتدائی مرحلے میں پی آئی اے اسلام آباد سے لندن کے لیے ہفتہ وار چار پروازیں چلائے گی جبکہ پی آئی اے پہلے ہی اسلام آباد سے مانچسٹر کے لیے ہفتہ وار تین پروازیں آپریٹ کر رہی ہے۔

پی آئی اے مستقبل میں پاکستان کے دیگر بڑے شہروں سے بھی لندن کے لیے پروازیں بحال کرنے کا ارادہ رکھتی ہے۔لندن کے لیے پروازیں ہیتھرو ایئرپورٹ کے جدید ترین ٹرمینل 4 سے آپریٹ کی جائیں گی۔

ترجمان نے مزید بتایا کہ برطانیہ کے لیے پروازوں سے پی آئی اے کی آمدن میں اضافے کی توقع ہے۔

 کیونکہ برطانیہ پی آئی اے کے اہم اور زیادہ طلب والے روٹس میں شمار ہوتا ہے، جہاں ماضی میں ایئرلائن برطانیہ کے مختلف شہروں کے لیے ہفتہ وار 22 سے زائد پروازیں آپریٹ کیا کرتی تھی۔