پی ٹی آئی کا مظاہرہ، پاکستان نے برطانیہ کو ڈی مارش جاری کردیا

پاکستان نے برطانیہ میں پیش آنے والے ایک حالیہ واقعے پر سخت احتجاج کرتے ہوئے برطانوی ڈپٹی ہیڈ آف مشن میٹ کینل کو وزارتِ خارجہ طلب کیا اور باضابطہ ڈیمارش جاری کیا۔

ذرائع کے مطابق برطانوی ہائی کمشنر جین میریٹ اس وقت پاکستان میں موجود نہیں تھیں، جس کے باعث وزارتِ خارجہ نے قائم مقام ہائی کمشنر کو طلب کر کے احتجاج ریکارڈ کرایا۔

ڈیمارش برطانیہ کے شہر بریڈفورڈ میں پاکستانی قونصل خانے کے باہر ہونے والے ایک احتجاج سے متعلق ہے۔ ذرائع کا کہنا ہے کہ مذکورہ مظاہرے کے لیے ایک سیاسی جماعت کے آفیشل اکاؤنٹ کے ذریعے لوگوں کو متحرک کیا گیا۔

احتجاج کے دوران مظاہرین نے چیف آف ڈیفنس فورسز کے خلاف نہایت اشتعال انگیز اور قابلِ اعتراض زبان استعمال کی، جبکہ فیلڈ مارشل کے خلاف سنگین نوعیت کی دھمکیاں بھی دی گئیں۔ ذرائع کے مطابق مظاہرے میں کار بم حملے کے ذریعے قتل کی باتیں بھی کی گئیں۔

پاکستانی حکام کا کہنا ہے کہ برطانوی سرزمین سے اس نوعیت کی دھمکیوں کا سنجیدگی سے نوٹس لیا گیا ہے اور برطانیہ پر واضح کیا گیا ہے کہ وہ اپنی زمین کو پاکستان کے خلاف عدم استحکام پیدا کرنے کے لیے استعمال ہونے سے روکے۔

پاکستان نے اس امید کا اظہار کیا ہے کہ برطانوی حکام اس واقعے میں ملوث عناصر کے خلاف سخت قانونی کارروائی کریں گے اور انہیں قانون کے کٹہرے میں لایا جائے گا۔

ترجمان دفترِ خارجہ طاہر حسین نے تصدیق کی ہے کہ برطانیہ کے قائم مقام ہیڈ آف مشن کو باقاعدہ ڈیمارش جاری کر دیا گیا ہے۔