پی ٹی آئی خیبرپخونخوا کے صدر نے محسن نقوی کو خبردار کردیا

پی ٹی آئی خیبرپختونخوا کے صدر اور رکن قومی اسمبلی جنید اکبر نے محسن نقوی کو جواب دیتے ہوئے کہا ہے کہ اس بار ہم پوری تیاری کے ساتھ نکلیں گے۔

جنید اکبر نے وزیرداخلہ کو گزشتہ روز دیے گئے بیان پر جواب دیتے ہوئے خبردار کیا کہ اگر اس بار کوئی غلطی کی گئی تو پھر ہم سے کوئی امید نہ رکھی جائے۔

انہوں نے کہا کہ پہلے ہمیں اندازہ نہیں تھا کہ ہمارے نہتے کارکنان پر گولیاں چلائی جائیں گی مگر اب کی بار ہم پوری تیاری کے ساتھ آئیں گے، وزیرداخلہ سمیت کوئی بھی غلط فہمی میں نہ رہے۔

جنید اکبر نے کہا کہ ہم اب کسی قسم کے ہتھکنڈوں سے ڈریں گے اور پیچھے نہیں ہٹیں گے، عمران خان کے حکم کے مطابق عوام کو مایوس نہیں کریں گے بلکہ انہیں اُن کا حق دلوائیں گے۔

پی ٹی آئی خیبرپختونخوا کے صدر نے اعلان کیا کہ صوابی میں 8 فروری کو ملکی تاریخ کا سب سے بڑا جلسہ ہوگا جس کی تیاریاں کی جارہی ہیں۔

انہوں نے لانگ مارچ اور احتجاج کا اشارہ دیتے ہوئے کہا کہ ماضی میں ہمارے کارکنان کے ساتھ ریاست نے دہشت گردی کی مگر اس بار کوئی کسی بھول میں نہ رہے۔