سعودی شہریوں کے پاکستان میں داخلے کیلیے عائد ویزا سمیت تمام پابندیاں ختم

وزیر داخلہ محسن نقوی نے اتوار کے روز سعودی شہریوں کے لیے داخلے کی پابندیاں ختم کرنے کا اعلان کیا، جس کا مقصد پاکستان اور سعودی عرب کے درمیان سفارتی اور معاشی تعاون کو مزید فروغ دینا ہے۔

یہ اعلان اسلام آباد کے ڈپلومیٹک انکلیو میں سعودی سفیر نواف بن سعید احمد المالکی سے ملاقات کے بعد سامنے آیا۔ ملاقات میں دو طرفہ تعلقات، قانون نافذ کرنے والے اداروں کے درمیان تعاون، اور سفری پالیسیوں میں تازہ پیش رفت پر تبادلہ خیال کیا گیا۔

وزیر داخلہ محسن نقوی نے سعودی عرب کی مستقل حمایت پر شکریہ ادا کیا، خصوصاً حالیہ انسداد منشیات کانفرنس میں شرکت کو سراہا، جو پاکستان اور خلیج تعاون کونسل (GCC) کے اشتراک سے منعقد کی گئی تھی۔

انہوں نے پاکستانی پاسپورٹ اور دستاویزاتی نظام میں کی جانے والی اصلاحات پر بھی بریفنگ دی، جن کا مقصد شناختی تصدیق اور دستاویزات کی سیکیورٹی کو بہتر بنانا ہے۔

اس موقع پر وزیر داخلہ نے ملک گیر سطح پر پیشہ ور بھکاریوں کے خلاف جاری مہم کا بھی ذکر کیا۔

محسن نقوی نے پانچ پاکستانی شہریوں کی رہائی پر سعودی حکومت کے تعاون کو سراہا، جو ایک منشیات اسمگلنگ کیس میں غلطی سے قید کیے گئے تھے۔ انہوں نے اس اقدام کو دونوں ممالک کے درمیان کامیاب ہم آہنگی کی مثال قرار دیا۔

سعودی سفیر نواف المالکی نے پاکستان کے ساتھ تعاون کو مزید مضبوط بنانے کے عزم کا اعادہ کیا، اور دونوں ممالک کے تاریخی تعلقات کا حوالہ دیتے ہوئے مختلف شعبہ جات میں تعاون کو وسعت دینے کی خواہش ظاہر کی۔

ملاقات کا اختتام دونوں جانب سے قریبی رابطے میں رہنے اور باہمی مفادات کے فروغ کے لیے مل کر کام کرنے کے عزم کے ساتھ ہوا۔