سندھ حکومت کا کے الیکٹرک کے خلاف اعلان جنگ، عوام کو بجلی بند کرنے اور مقدمات کی ترغیب

سندھ اسمبلی میں کے الیکٹرک سمیت دیگر بجلی کی تقسیم کار کمپنیوں کے خلاف قرارداد متفقہ طور پر منظور کرلی گئی جبکہ صوبائی حکومت نے کے الیکٹرک کے خلاف اعلان جنگ کردیا ہے۔

سندھ اسمبلی کے اجلاس میں صوبائی وزیر بلدیات سعید غنی نے اظہار خیال کرتے ہوئے کہا کہ اگر کوئی گرمی  کے دوران لوڈشیڈنگ سے مرجائے تو ایف آئی آر کے الیکٹرک کے خلاف کٹنی چاہیے۔ 

انہوں نے کہا کہ لوڈ شیڈنگ کی صورت میں عوام کو کے الیکٹر کے دفتروں میں گھس کر بجلی بن کرنی اور پھر عملے کو دس گھنٹے بغیر بجلی کے بٹھانا چاہیے، پھر انہیں گرمی اور عوام پر ہونے والے ظلم کا احساس ہوگا۔

سعید غنی نے عوام سے کہا کہ وہ کے الیکٹرک کے خلاف کسی بھی قسم کے تشدد اور گالی گفتار سے گریز کریں۔

اسمبلی اجلاس میں شرجیل میمن نے کہا کہ امید کرتے ہیں وفاقی حکومت توانائی کی کمپنیوں کے خلاف سنجیدہ اقدامات کرے تاکہ غنڈہ گردی ختم ہو، پاور کمپنیاں صارفین کو من پسند یونٹس کے بل بھیج کر غنڈہ گردی کررہی ہے لہذا اس عمل کو فوری بند کیا جائے۔

انہوں نے کہا کہ اگر دو بندے بجلی کا بل نہ دیں یا ڈیفالٹر ہوں تو پورے علاقے کی بجلی کاٹ دینا ظلم ہے، کسی قانون میں ایک بندے کی سزا دوسرے کو دینے کا تذکرہ نہیں ہے۔ 

قبل ازیں سندھ اسمبلی کے اجلاس میں ہیسکو، سیپکو اور کے الیکٹرک کے خلاف قرارداد متفقہ طور پر منظور کی گئی۔