وال چاکنگ اور سوشل میڈیا پر مہم کے بعد کراچی میں دہشت گردی کا الرٹ جاری

وال چاکنگ اور سوشل میڈیا پر فوجی قیادت کے خلاف مہم کے بعد کراچی میں دہشت گردی کے حوالے سے الرٹ جاری کردیا گیا۔

نیکٹا کی جانب سے جاری ہونے والے الرٹ میں بتایا گیا ہے کہ کراچی کے ضلع جنوبی میں دہشت گردی کا خطرہ ہے لہذا رینجر اور پولیس الرٹ رہے۔

حساس اداروں نے اس ضمن میں ریڈ الرٹ جاری کردیا، جس میں کہا گیا ہے کہ پولیس رینجرز اور فوج کی جانب سے الیکشن کے پرامن انعقاد پر دہشت گرد جھنجھلاہٹ کا شکار ہیں۔

الرٹ کے مطابق دہشت گرد وال چاکنگ اور سوشل میڈیا پر بھی فوج اور فوجی قیادت کے خلاف سرگرم ہیں۔ اور وہ دہشت گرد سندھ اسمبلی کی بلڈنگ ، سندھ ہائی کورٹ ، سندھ سیکریٹریٹ ، کراچی پریس کلب کو نشانہ بناسکتے ہیں لہذا عوام حساس مقامات پر جانے سے گریز کریں۔