آئندہ 15 روز کیلیے پیٹرول کی قیمت میں بڑی کمی کا امکان

حکومت کی جانب سے آئندہ پندرہ روز کیلیے  پیٹرولیم مصنوعات کی قیمتوں میں کمی کا  امکان ظاہر کیا جارہا ہے۔

ذرائع نے جمعرات کو بتایا کہ مہنگائی سے تنگ عوام کو ریلیف فراہم کرنے کے لیے، وفاقی حکومت کی جانب سے اگلے پندرہ ہفتے کے لیے پیٹرولیم مصنوعات کی قیمتوں میں کمی کی توقع ہے۔

وزارت خزانہ کے باخبر ذرائع نے بتایا کہ 16 جون سے پیٹرول کی قیمت میں 9 روپے فی لیٹر کمی کا امکان ہے۔ ذرائع نے بتایا کہ ڈیزل کی قیمت میں 4 روپے فی لیٹر کمی متوقع ہے۔ مٹی کے تیل کی قیمت میں آئندہ 15 روز تک 2 روپے فی لیٹر کمی کا امکان ہے۔

واضح رہے کہ  عالمی منڈی میں پیٹرول کی قیمت 5.14 ڈالر فی بیرل کم ہو کر 89 ڈالر فی بیرل ہوگئی ہے۔ ذرائع کے مطابق وزیر اعظم شہباز شریف کی قیادت میں حکومت بین الاقوامی قیمتوں میں کمی سے ریلیف ان لوگوں تک پہنچائے گی جو اپنے خاندان کا پیٹ پالنے کے لیے جدوجہد کر رہے ہیں۔

پچھلے پندرہ دن کے جائزے میں، پٹرول اور ڈیزل کی قیمتوں میں بالترتیب 4.74 روپے فی لیٹر اور 3.86 روپے فی لیٹر کی کمی کی گئی تھی، جس کے بعد پٹرول اور ڈیزل کی موجودہ قیمتیں بالترتیب 268.36 روپے اور 270.22 روپے فی لیٹر پر ہیں۔

تاہم وزارت خزانہ نئی قیمتوں کا اعلان وزیراعظم سے مشاورت کے بعد 15 جون کی رات کرے گی۔