آئینی حدود: فضل الرحمان کا آرمی چیف کو سخت جواب

جمعیت علما اسلام کے سربراہ مولانا فضل الرحمان نے آرمی چیف کا نام لیے بغیر کہا ہے کہ آئینی حدود کے بارے میں آپ جانتے ہیں مگر تجاوز کئی گنا زیادہ کرتے ہیں۔

کراچی میں عوامی اسمبلی جلسے سے خطاب کرتے ہوئے فضل الرحمان نے کہا کہ اسٹیبلشمنٹ کی نوکری کرنے والے کو ہی ملک کا وفادار سمجھا جاتا ہے، اب بات صرف حکومت تک نہیں بلکہ اس سے بہت آگے بڑھ چکی ہے اور صرف جمہوریت نہیں بلکہ اب بہت کچھ طے ہونا ہے۔

انہوں نے اگر اسٹیبلشمنٹ یہ سمجھتی ہے کہ یہ لوگ تھک جائیں گے تو یہ ان کی بھول ہے، ہم ملک کو جمہوری اور آئینی اصولوں پر لانے تک اپنی تحریک جاری رکھیں گے۔ 2018 کے بعد ہم نے دھاندلی کے خلاف اپنی تحریک چلائی اُس وقت بھی ان کا یہی خیال تھا  مگر ہمارے ہر کارکن نے اس جدوجہد کو جاری رکھا۔ ہمیں پتا ہے آپ کو اپنی آئینی حدود کا علم ہوگا۔

مولانا فضل الرحمان نے کہا کہ ہم ان کے لیے رکاوٹ اور خطرہ تھے اور ہمیں ہروانا ان کے مقاصد میں شامل تھا، ہم ایوانوں میں ہوتے تو نہ یہ جزیرے بیچ سکتے اور نہ ہی کوئی اور غلط کام کر سکتے تھے، جمہوریت مر چکی ہے صرف جمہوریت کا لفظ استعمال ہورہا ہے، ملک میں جمہوریت کا خاتمہ کردیا گیا ہے۔