بھارت میں 3 ہزار سال پہلے زندگی کے آثار دریافت

رانچی: جھاڑکھنڈ کے ضلع ہزارہ باغ کے چوپارن بلاک میں 2,500 سے 3,000 سال پرانی تہذیب کے آثار قدیمہ کے ثبوت ملے ہیں۔ 

نیویارک کے ہیملٹن کالج کے شعبہ تاریخ میں ایشیائی مطالعات کے سربراہ ڈاکٹر ابھیشیک سنگھ امر نے حال ہی میں اس سائٹ کا دورہ کیا اور اسے آثار قدیمہ کی اہمیت کا ایک بڑا مرکز قرار دیا۔ 

ان کا خیال ہے کہ وسیع پیمانے پر کھدائی سے قدیم تہذیبوں کے بارے میں مزید معلومات سامنے آ سکتی ہیں۔  

اس سے قبل، آرکیالوجیکل سروے آف انڈیا (ASI) کی رانچی اور پٹنہ زون کی ٹیموں نے اس خطے کے دیہار، سہرا، منگڑھ، اور ہتھیندر گاؤں کی تلاشی لی تھی۔ انہوں نے نارتھرن بلیک پالشڈ ویئر (NBPW) کے نمونے جمع کیے ہیں، جو 300 سے 100 قبل مسیح کی تہذیبوں سے منسلک ایک قسم کے سیاہ چمکدار برتن ہیں۔ مزید کھدائی اور تحقیق کے لیے ASI کے مرکزی دفتر کو ایک تجویز بھیجی گئی ہے۔  

پٹنہ زون ASI کی ٹیم، جس کی قیادت ماہر آثار قدیمہ ایم جی نکوس نے کی، نے منگڑھ گاؤں میں ایک بڑے ٹیلے کو قدیم بدھ اسٹوپا کے طور پر شناخت کیا ہے۔ گاؤں والے نسلوں سے اس اونچے ٹیلے کی پوجا کرتے آئے ہیں۔