خلیجی ممالک میں شہری علاقوں کو امریکی فوجیوں کی وجہ سے نشانہ بنایا، عراقچی

ایران کے وزیر خارجہ عباس عراقچی نے کہا ہے کہ خطے میں امریکی افواج کی جانب سے فوجی اڈوں سے نکل کر شہری علاقوں اور ہوٹلوں میں منتقل ہونے کے باعث حساس مقامات بھی حملوں کی زد میں آئے۔

میڈیا سے گفتگو میں انہوں نے مؤقف اختیار کیا کہ جہاں جہاں امریکی فوج یا اس کی تنصیبات موجود تھیں، انہیں نشانہ بنایا گیا، تاہم بعض مقامات آبادی کے قریب ہونے کی وجہ سے عام شہری بھی اس صورتحال سے متاثر ہوئے۔ ان کا کہنا تھا کہ ان کارروائیوں کے نتیجے میں خلیجی ممالک کے عوام کو مشکلات اور نقصان کا سامنا کرنا پڑا۔

عباس عراقچی نے مزید کہا کہ 28 فروری کو شروع ہونے والی کشیدگی کی ذمہ داری امریکا پر عائد ہوتی ہے، اور شہری علاقوں کے قریب پیش آنے والے واقعات بھی اسی پالیسی کا نتیجہ ہیں۔

انہوں نے زور دیا کہ خطے میں بڑھتی ہوئی صورتحال کے اثرات عام لوگوں تک پہنچ رہے ہیں، جو تشویش کا باعث ہے۔