غزہ سے متعلق مواد لگانے پر سابق میٹا انجینئر نوکری سے برطرف، ملازم نے مقدمہ دائر کردیا

سابق میٹا انجینئر نے کمپنی پر مقدمہ دائر کرتے ہوئے کہا کہ اسے غزہ کے مواد کو ہینڈل کرنے پر نوکری سے برطرف کردیا گیا تھا۔

ایک سابق میٹا انجینئر نے منگل کے روز کمپنی پر غزہ کی جنگ سے متعلق مواد کو محفوظ کرنے پر تعصب کا الزام لگایا، مقدمے میں دعوی کیا کہ میٹا نے فلسطینی انسٹاگرام پوسٹس کو حذف کرنے والے وائرس ختم کرنے میں مدد کرنے کی کوشش کرنے پر اسے برطرف کیا۔

فیراس حماد، ایک فلسطینی نژاد امریکی انجینئر جو 2021 سے میٹا کی مشین لرننگ ٹیم میں شامل تھے، نے کیلیفورنیا کی ایک ریاستی عدالت میں اس سوشل میڈیا کمپنی کے خلاف امتیازی سلوک، غلط طریقے سے برطرفی کا مقدمہ دائر کیا۔

شکایت میں، حماد نے میٹا پر فلسطینیوں کے خلاف تعصب کا الزام لگایا، کہا کہ کمپنی نے ملازمین کے ذاتی مواد کو حذف کر دیا جس میں غزہ میں ان کے رشتہ داروں کی موت کا ذکر کیا گیا تھا اور ان کے فلسطینی پرچم کے ایموجی کے استعمال کی تحقیقات کی گئی تھیں۔

مقدمہ کے مطابق، کمپنی نے اسی طرح کے سیاق و سباق میں اسرائیلی یا یوکرائنی پرچم کے ایموجیز پوسٹ کرنے والے ملازمین کے لیے ایسی کوئی تحقیقات شروع نہیں کیں۔

میٹا نے حماد کے الزامات پر تبصرہ کرنے کے لئے رائٹرز کی درخواست کا فوری طور پر جواب نہیں دیا۔

واضح رہے کہ 7 اکتوبر کو حماس کے اسرائیل کے اندر حملے کے بعد غزہ میں تنازعہ شروع ہوا، جس میں 1,200 افراد ہلاک اور 250 سے زائد افراد کو یرغمال بنا لیا گیا۔ اسرائیل نے جواب میں غزہ میں ایک جارحیت شروع کی جس میں غزہ کے محکمہ صحت کے حکام کے مطابق، 36,000 سے زیادہ افراد ہلاک ہو چکے ہیں، اور ایک انسانی بحران کو جنم دیا ہے۔