کمپیوٹر کے کی بورڈ میں 30 سال بعد نئے بٹن کا اضافہ، یہ کیا کام کرے گا؟ جانیے

کمپیوٹر بنانے والی عالمی شہرت یافتہ کمپنی مائیکروسافٹ نے 30 سال میں پہلی بار کی بورڈ میں اہم تبدیلی کردی، جس پر صارفین بھی حیران ہوئے ہیں۔

کمپنی کی جانب سے نئے کی بورڈ میں اسپیس کے سیدھے ہاتھ پر جہاں پہلے ALT کا بٹن ہوتا تھا اُس سے قبل ایک بٹن کا اضافہ کیا گیا ہے جس کو پائلٹ کی کا نام دیا گیا ہے۔

اس سے قبل اسٹینٹڈرڈ کی بورڈ میں 104 بٹن ہوتے تھے تاہم اب نئے کی بورڈ میں 105 بٹن ہوں گے۔

نئے بٹن سے کیا کام ہوسکے گا؟

اس بٹن کی مدد سے صارفین مائیکرو سافٹ کے مصنوعی ذہانت کے حامل پروگرامز تک براہ راست رسائی حاصل کرسکیں گے۔

کمپنی نے کی بورڈ میں ہونے والی تبدیلی کے حوالے سے کہا ہے کہ ’پائلٹ بٹن کو شامل کرنے کا مقصد غیر معمولی یا مشکل آپریشنز کی انجام دہی میں مدد فراہم کرنا ہے‘۔

’اس بٹن کی مدد سے ای میلز تحریر کرنا، خلاصہ کرنا یا پریزینٹیشنز کی مصنوعی ذہانت کے پروگرام کی مدد سے تصویر بنانا انتہائی آسان ہوگا اور سب سے بڑھ کر صارف کا وقت بھی بچے گا اور یہ تبدیلی والا کی بورڈ مارکیٹ میں فروری کے آخر سے دستیاب ہوگا۔

واضح رہے کہ مائیکرو سافٹ نے اس سے قبل 102 کیز والے کیبورڈ میں ونڈوز کے دو بٹنوں کا 1994 میں اضافہ کیا تھا، جس کی مدد سے پروگرام تک ایک کلک پر رسائی ممکن ہوگئی ہے۔