پاکستان میں ٹویٹر (ایکس) کی سروس معطل، پی ٹی اے نے وجہ بتادی

پاکستان میں سوشل میڈیا سروس ایکس میں تعطل پر پی ٹی اے نے وضاحت جاری کرتے ہوئے صارفین میں پھیلنے والی بے چینی کو دور کرتے ہوئے معطلی کی وجہ بیان کردی۔

تفصیلات کے مطابق پاکستان ٹیلی کمیونیکیشن اتھارٹی(پی ٹی اے) نے ایکس سروس کی بندش پر ایک اعلامیہ جاری کیا جس میں ترجمان کا کہنا ہے کہ سوشل میڈیا پلیٹ فارم ایکس (سابقہ ٹوئٹر) اس وقت پاکستان سمیت دنیا کے متعدد ممالک میں بڑے پیمانے پر سروس تعطل کا شکار ہے۔

اعلامیے میں کہا گیا ہے کہ یہ تعطل اُس عالمی مسئلے کے بعد پیش آیا ہے ایکس کو سروس کے تعطل کا سامنا پلیٹ فارم کو جمعرات(22 مئی) کو بھی کرنا پڑا تھا جو کئی گھنٹوں تک جاری رہا اور بعد ازاں سوشل میڈیا پلیٹ فارم ایکس نے اسے خود بحال کیا۔

 پی ٹی اے کا کہنا ہے کہ دوران تحقیقات یہ بات سامنے آئی ہے کہ پاکستان کے انٹرنیٹ گیٹ ویز کو کسی تکنیکی مسئلے کا سامنا نہیں ہے اور ملک بھر میں دیگر تمام انٹرنیٹ سروسز معمول کے مطابق کام کر رہی ہیں۔

اعلامیے میں کہا گیا ہے کہ انٹرنیٹ کی نگرانی کرنے والے عالمی ادارے نیٹ بلاکس نے بھی اس بات کی تصدیق کی ہے کہ ایکس کو درپیش یہ تعطل بین الاقوامی نوعیت کا ہے اور اس کا کسی ملک کی سطح پر انٹرنیٹ سروس میں رکاوٹ یا فلٹرنگ سے کوئی تعلق نہیں ہے۔

پی ٹی اے اس صورتحال کی مسلسل نگرانی کئے ہوئے ہے اور عوام کو کسی بھی اہم پیش رفت سے بروقت آگاہ کیا جائے گا۔