ٹک ٹاک کا گرینڈ آپریشن، تین ماہ میں کروڑوں ویڈیوز ڈیلیٹ کردیں

ٹک ٹاک نے 2025 کی پہلی سہ ماہی (جنوری تا مارچ) کی کمیونٹی گائیڈ لائنز پر عملدرآمد کی رپورٹ جاری کر دی ہے، جس میں پلیٹ فارم پر قواعد و ضوابط کی پابندی کو اجاگر کیا گیا ہے۔

پاکستان میں ٹک ٹاک نے اس عرصے کے دوران 24,954,128 ویڈیوز حذف کیں جو کمیونٹی گائیڈ لائنز کی خلاف ورزی کر رہی تھیں۔

حذف کی گئی ویڈیوز میں سے 99.4 فیصد کو پوسٹ ہونے سے پہلے ہی ہٹا دیا گیا، اور ان میں سے 95.8 فیصد ویڈیوز 24 گھنٹوں کے اندر حذف کر دی گئیں۔

عالمی سطح پر ٹک ٹاک نے مجموعی طور پر 211 ملین ویڈیوز حذف کیں، جو کل اپ لوڈ کردہ مواد کا تقریباً 0.9 فیصد ہے۔

ان میں سے 184,378,987 ویڈیوز خودکار نظام کے ذریعے شناخت کی گئیں، جبکہ 7,525,184 ویڈیوز کو مزید جانچ کے بعد بحال کیا گیا۔

عالمی سطح پر بھی پیشگی حذف کرنے کی شرح 99.0 فیصد رہی، اور 94.3 فیصد مواد پوسٹ ہونے کے 24 گھنٹوں کے اندر ہٹا دیا گیا۔

خلاف ورزیوں کی نوعیت

حذف کی گئی ویڈیوز میں سے 30.1 فیصد حساس یا بالغ موضوعات پر مبنی تھیں۔

11.5 فیصد نے پلیٹ فارم کے تحفظ اور شائستگی کے معیارات کی خلاف ورزی کی۔

15.6 فیصد نے پرائیویسی اور سیکیورٹی کی ہدایات کی خلاف ورزی کی۔

45.5 فیصد ویڈیوز کو غلط معلومات پر مبنی قرار دیا گیا، جس میں سے 13.8 فیصد ترمیم شدہ میڈیا اور مصنوعی ذہانت سے تیار کردہ مواد شامل تھا۔