2 کروڑ تاوان کے لیے کراچی سے اغوا بچہ مورو سے بازیاب

کراچی:  شہر قائد سے اغوا ہونے والا تین سالہ بچہ مورو سے بازیاب کر لیا گیا ہے، ملزمان نے دو کروڑ روپے تاوان مانگا تھا۔

تفصیلات کے مطابق کراچی کے علاقے شاہ لطیف ٹاؤن سے اغوا کیے جانے والے تین سالہ بچے زین کو اندرونِ سندھ کے شہر مورو سے بازیاب کرا لیا گیا ہے۔

بچے کی بازیابی کے لیے ملیر پولیس اور سی پی ایل سی نے ضلع نوشہرو فیروز کے شہر مورو میں کامیاب کارروائی کرتے ہوئے ایک گھر سے بچے کو بازیاب کرایا اور وہاں موجود ایک ملزم کو گرفتار کر لیا۔

 ملزمان نے بچے کی رہائی کے لیے 2 کروڑ روپے تاوان کا مطالبہ کیا تھا۔ایس ایس پی عبدالخالق پیرزادہ نے بتایا کہ ملزمان نے تین سالہ زین کو گھر کے قریب کھیلتے ہوئے اغوا کیا تھا۔

 بچے کی بازیابی کے لیے ڈی ایس پی اور ایس ایچ او شاہ لطیف کی سربراہی میں ٹیم تشکیل دی گئی تھی، جب کہ کارروائی کے دوران اے وی سی سی اور نوشہرو فیروز پولیس بھی شامل تھی۔

ایس ایس پی کا کہنا ہے کہ ملزمان تین سالہ بچے کو کراچی سے 400 کلومیٹر دور کیسے لے کر گئے، اس حوالے سے گرفتار ملزم سے تفتیش کی جا رہی ہے، جب کہ اس کے دیگر ساتھیوں کی تلاش بھی جاری ہے۔