آوارہ کتوں کے حملے میں 3 سالہ بچی جاں بحق

لودھراں : لودھراں کے علاقے دنیا پور میں آوارہ کتوں کے حملے میں  3 سالہ بچی جاں بحق ہوگئی۔

اطلاعات کے مطابق دنیا پور میں مدرسے سے واپس آتے ہوئے بچی  پر کتوں کے ٹولے نے حملہ کیا۔ کتے اسے گھسیٹتے ہوئے قریبی گندم کے کھیت میں لے گئے جہاں اسے شدید چوٹیں آئیں اور حملے کے نتیجے میں وہ دم توڑ گئی۔

اس خوفناک واقعے نے ضلع میں آوارہ کتوں کے بڑھتے ہوئے مسئلے کے بارے میں مکینوں میں تشویش کو جنم دیا ہے۔ مقامی لوگوں نے دعوی کیا کہ مہلک حملے سے قبل میونسپل حکام کو بارہا شکایات کی گئیں لیکن عوام کے لیے کوئی حفاظتی اقدامات نہیں کیے گئے۔

دنیا پور کے مکینوں نے افسوسناک واقعہ کے ذمہ دار حکام کے خلاف فوری کارروائی کا مطالبہ کیا ہے۔ انہوں نے مزید سانحات کو روکنے کے لیے کتوں کی بہتات پر قابو پانے اور عوامی تحفظ کے اقدامات پر فوری عمل درآمد کرنے کا بھی کہا ہے۔