بجلی کا بل ادا کرنے کے لیے معذور شخص اپنا دل اور گردہ بیچنے پر مجبور

جڑانوالہ: ایک چونکا دینے والے واقعے میں پنجاب کے رہائشی نے اپنا بجلی کا بل ادا کرنے کے لیے گردہ فروخت کرنے کا اعلان کیا ہے، جس کی ویڈیو سوشل میڈیا پر وائرل ہو رہی ہے۔

متاثرہ شہری یاسین نے بتایا کہ وہ پانچ سال سے معذوری کی زندگی گزار رہا ہے اور سوال کیا کہ 10 ہزار 300 روپے کا بل کیسے ادا کر سکتا ہے۔

اس کا کہنا تھا کہ دل اور گردے کے ساتھ ساتھ بجلی کا بل ادا کرنے کے لیے میری آنکھیں بھی لی جائیں۔شہری نے حکومت سے اپیل کی کہ غریب اور نادار خاندانوں کو مفت بجلی فراہم کرنے کا وعدہ پورا کیا جائے۔

معذور نوجوان کی ویڈیو سوشل میڈیا پر ٹاپ ٹرینڈ بن چکی ہے جب کہ جڑانوالہ سرکل کے قریبی گاں کا رہائشی یاسین کسی نجات دہندہ کا منتظر ہے۔

بجلی کے مہنگے بلوں نے عوام کو ادائیگی کے لیے اپنا سامان بیچنے پر مجبور کر دیا ہے۔ حال ہی میں یہ بات سامنے آئی ہے کہ حکومت نے آئی ایم ایف کو نئے قرضہ پروگرام کے لیے خوش کرنے کے لیے بجلی کی قیمت میں 5 روپے فی یونٹ اضافے کا فیصلہ کیا ہے۔