بلوچستان کے لرزہ خیز واقعے میں ملوث 11 افراد گرفتار

کوئٹہ: بلوچستان کے وزیراعلیٰ میر سرفراز بگٹی نے پسند کی شادی کے تنازع پر ایک خاتون اور ایک مرد کے دن دہاڑے بہیمانہ قتل کے الزام میں 11 افراد کی گرفتاری کی تصدیق کی ہے۔ 

یہ لرزہ خیز واقعہ سوشل میڈیا پر ایک دل دہلا دینے والی ویڈیو وائرل ہونے کے بعد سامنے آیا، جس نے حکام کو فوری کارروائی پر مجبور کیا۔

وائرل ویڈیو میں دیکھا جا سکتا ہے کہ مقتول جوڑا چند افراد کے ساتھ صحرا میں اپنی گاڑیوں سے اتر رہا ہے۔ اس کے بعد مردوں نے بندوقیں جوڑے کی طرف تان لیں، جو ساکت کھڑے تھے، بظاہر گولی لگنے کا انتظار کر رہے تھے۔ ملزمان نے متاثرین پر کئی گولیاں فائر کرکے انہیں بے دردی سے قتل کر دیا۔

وزیراعلیٰ بگٹی نے سوشل میڈیا پر جاری اپنے بیان میں کہا کہ وائرل فوٹیج میں نظر آنے والے دونوں متاثرین کی شناخت کر لی گئی ہے، اور تمام ملوث افراد کی گرفتاری کے لیے ایک بڑا آپریشن جاری ہے۔

 انہوں نے زور دیا، "اب تک 11 مشتبہ افراد کو حراست میں لیا گیا ہے۔ ریاست مظلوموں کے ساتھ کھڑی ہے۔"

وزیراعلیٰ نے مزید انکشاف کیا کہ ابتدائی تحقیقات سے پتہ چلتا ہے کہ یہ دوہرا قتل عید سے چند روز قبل ہوا تھا، حالانکہ ویڈیو حال ہی میں منظر عام پر آئی ہے۔ انہوں نے مزید کہا کہ فوٹیج سامنے آنے کے بعد پولیس کو فوری کارروائی کی ہدایت کی گئی تھی، اور ریاست کی مدعیت میں انسداد دہشت گردی کی دفعات کے تحت مقدمہ درج کر لیا گیا ہے۔ وزیراعلیٰ بگٹی نے یہ بھی کہا کہ باقی ملزمان کو ٹریک کرنے کی کوششیں جاری ہیں۔

اگرچہ متاثرین کے ورثاء نے ابھی تک کوئی ایف آئی آر درج نہیں کروائی ہے، وزیراعلیٰ بگٹی نے تصدیق کی کہ ریاست اس کیس کی پیروی کرے گی۔

 اس گھناؤنے فعل نے ملک بھر میں غم و غصے کی لہر دوڑا دی ہے، شہریوں نے حکومت سے مطالبہ کیا ہے کہ تمام ذمہ داروں کو سخت سے سخت سزا دی جائے۔