بیوی کی نازیبا تصاویر شیئر کرنے پر کراچی کے شہری کو 14 سال قید

کراچی کی ایک ڈسٹرکٹ اینڈ سیشن عدالت نے منگل کو ایک شخص کو اپنی بیوی کی نامناسب تصاویر آن لائن شیئر کرنے پر 14 سال قید کی سزا سنادی۔

 جوڈیشل مجسٹریٹ ایسٹ کراچی نے ملزم پر 90 ہزار روپے جرمانہ بھی عائد کیا جس کی شناخت فیضان کے نام سے ہوئی ہے۔

 استغاثہ کے مطابق فیضان نے اپنی بیوی کی نازیبا تصاویر سوشل میڈیا کے ذریعے اپنے بھائی کو بھیجیں اور انہیں بلیک میل کرنے کے لیے استعمال کیا۔

 ملزم کے وکیل نے دعویٰ کیا کہ ملزم کے موبائل فون کا غلط استعمال کیا گیا تاہم عدالت نے دلیل مسترد کردی۔

 عدالت نے کہا کہ فیضان اپنے دفاع میں کوئی گواہ یا ثبوت پیش کرنے میں ناکام رہے اور اس کے اقدامات سے متاثرہ اور اس کے خاندان کی عزت کو داغدار کیا گیا۔ 

 فیضان کو الیکٹرانک جرائم کی روک تھام کے ایکٹ (پیکا) کے تحت سزا سنائی گئی تھی، جسے 2016 میں ہراساں کرنے اور نفرت انگیز تقاریر کے خلاف ڈھال کے طور پر متعارف کرایا گیا تھا۔