جائیداد کی لالچ میں بھائی کو زہر کا انجکشن لگا کر قتل کرنے والا ملزم پکڑا گیا

شہر قائد کے علاقے قائدآباد کی تفتیشی پولیس نے ایک سنگین واقعے میں بھائی کو زہریلا انجکشن لگا کر قتل کرنے کے الزام میں مرکزی ملزم ایاز الدین کو گرفتار کر لیا ہے۔ یہ واقعہ جائیداد کے تنازعے سے متعلق بتایا جا رہا ہے۔

مقتول غیاث الدین (45 سال) اپنی والدہ کے ساتھ رہائش پذیر تھا اور والدہ کی جائیداد کی دیکھ بھال کرتا تھا، جس کو بھائی اور ملزم ایاز الدین نے کینسر کا مریض بتاکر مردہ ظاہر کیا۔

ملزم ایاز الدین نے ابتدائی طور پر دعویٰ کیا تھا کہ اس کا بھائی نشے کا عادی اور کینسر کا مریض تھا۔ پولیس کو معاملہ مشکوک لگنے پر تفتیش شروع کی۔

ڈسٹرکٹ ملیر پولیس کے ترجمان کے مطابق پولیس نے ٹیکنیکل بنیادوں پر تفتیش کرتے ہوئے ملزم کو حراست میں لیا۔

دوران تفتیش ملزم نے اعتراف کیا کہ اس نے جائیداد کے تنازعے پر بھائی کو زہریلا انجکشن لگا کر قتل کیا اور اس منصوبے میں اُس کے ساتھ بہن، بہنوئی بھی شریک تھے۔

پولیس اب دیگر ملوث ملزمان کی گرفتاری کے لیے چھاپے مار رہی ہے

واقعے کو ابتدائی طور پر طبعی موت ظاہر کرنے کی کوشش کی گئی تھی، جو پولیس کی چھان بین کے بعد ناکام ہوئی