کراچی، کورنگی مہران ٹاؤن میں ایک اور بچہ مین ہول میں گر کر جاں بحق

کراچی: کورنگی مہران ٹاؤن میں ایک اور بچہ مین ہول میں گر کر زندگی کی بازی ہار گیا، کمسن بچہ انتظامی نااہلی اور غفلت کی بھینٹ چڑھ  گیا۔

تفصیلات کے مطابق کورنگی کے علاقے مہران ٹاؤن سیکٹر 6  جی میں گھر کے باہر کھیلتے ہوئے 8  سالہ بچہ کھلے مین ہول میں گرا اور موقع پر ہی جاں بحق ہوگیا جس کی شناخت دلبر کے نام سے ہوئی۔

دوسری جانب شہر قائد کے علاقے گلستان جوہر بلاک 9 میں واقع ال حبیب یونیورسٹی کے قریب سے ایک بزرگ خاتون کی کئی روز پرانی لاش برآمد ہوئی ہے۔

ترجمان کراچی پولیس کے مطابق متوفیہ کی شناخت 60 سالہ  نجما الرحمن دختر یامین الرحمن کے نام سے ہوئی ہے۔پولیس حکام کا کہنا ہے کہ لاش 7 سے 8 روز پرانی ہے، جسے قانونی کارروائی کے لیے جناح اسپتال منتقل کر دیا گیا ہے۔

واقعے کی اطلاع ملتے ہی شاہراہِ فیصل تھانے کی پولیس موقع پر پہنچی اور شواہد اکٹھے کرتے ہوئے تحقیقات کا آغاز کر دیا۔