کراچی، شاہراہ فیصل پر واقع ہوٹل سے خاتون کی ذبح ہوئی برہنہ لاش برآمد

کراچی کے علاقے شاہراہ فیصل پر واقع نجی ہوٹل کے کمرے سے خاتون کی برہنہ لاش برآمد ہوئی ہے جسے مبینہ طور پر شوہر نے ذبح کر کے قتل کیا ہے۔

تفصیلات کے مطابق شاہراہِ فیصل نرسری کے قریب نجی ہوٹل کے کمرے سے خاتون کی لاش ملی۔ پولیس کے مطابق خاتون کی شناخت 35 سالہ ارم زوجہ عادل کے نام سے کرلی گئی۔

مقتولہ کو گلے پر تیز دھار آلے کے وار کرکے قتل کیا گیا۔۔پولیس حکام کے مطابق ٹیپو سلطان تھانے کی حدود میں واقعے نجی ہوٹل کے کمرے سے چیخ پکار اور لڑائی جھگڑے کی آوازیں آئیں۔ جسکے بعد انتظامیہ کمرے میں پہنچی تو اندر خاتون کی لاش برہنہ حالت میں موجود تھی جبکہ ملزمان جائے وقوعہ سے فرار ہوچکے تھے۔

انتظامیہ کی جانب سے پولیس کو فوری طور پر اطلاع دی گئی۔ پولیس نے جائے وقوعہ پہنچ کر لاش کو تحویل میں لیا اور ضابطے کی کارروائی کیلئے جناح اسپتال روانہ کردیا۔ 

پولیس کے مطابق مقتولہ ارم چنیسر گوٹھ کی رہائشی ہے اور تین بچوں کی والدہ ہے۔ نجی ہوٹل کے کمرے میں مقتولہ اپنے شوہر عادل کے ساتھ موجود تھی۔ مقتولہ کا شوہر عادل واردات کے بعد سے فرار ہے۔

ابتدائی تفتیش کے مطابق ملزمہ کا شوہر پیشے سے قصاب ہے۔ ملزم مبینہ طور پر جمعے کی شام برنس روڈ پر واقعے گوشت کی دکان سے چھری لیکر گھر آیا تھا اور اس ہی چھری سے واردات انجام دینے کے بعد آلہ قتل جائے وقوعہ پر چھوڑ کر فرار ہوا۔ 

پولیس نے آلہ قتل تحویل میں لیکر ملزم کی تلاش میں آئی آئی چندریگڑھ اور برنس روڈ کے مقام پر چھاپہ مارے تاہم ملزم گرفتار نہیں کیا جا سکا۔ 

ملزم کے بھائی بھی واردات کے بعد سے فرار ہیں جبکہ مقتولہ کی اپنے شوہر سے لڑائی جھگڑے کی وجوہات تاحال سامنے نہیں آسکی ہیں۔ 

دریں اثنا لیاری اولڈ کمہار واڑہ تھانہ نیپیئر کی حدود میں گھر سے خاتون کی پھندا لگی لاش ملی۔۔ ریسکیو حکام کے مطابق خاتون کی شناخت 30 سالہ لمیلا کے نام سے کرلی گئی۔

پولیس کے مطابق خاتون نے گھریلو ناچاکی کے باعث مبینہ طور پر خود کو پھندہ لگا کر خود کشی کی ہے تاہم واقعے کی مزید تفتیش کی جارہی ہے لاش کو ضابطے کی کارروائی کیلئے سول اسپتال منتقل کیا گیا ہے۔