کراچی میں شدید گرمی کے باعث 200 سے زائد عزاداروں کی حالت غیر، اسپتال منتقل

کراچی میں درجہ حرارت 51 ڈگری سینٹی گریڈ محسوس ہونے، سمندری ہوا بند ہونے اور لو چلنے کے باعث شدید گرمی ہے۔

شدید گرمی کے باوجود عزادار مذہبی عقیدت و احترام کے باعث مجالس اور جلوس میں شریک ہوئے اور شدید گرمی کو برداشت نہ کرسکے۔

ایگزیکٹو ڈائریکٹر  جناح اسپتال ڈاکٹرشاہد رسول نے بتایا کہ جناح اسپتال کےکیمپ میں دوپہر ایک بجے تک گرمی سے متاثر افراد کے 200 کیسز رپورٹ ہوئے۔ جنہیں ابتدائی طبی امداد فراہم کر کے روانہ کردیا گیا ہے اور سب کی حالت خطرے سے باہر ہے۔

انہوں نے بتایا کہ اسپتال آنے والوں میں تمام عمر کے لوگ تھے تاہم بزرگوں کی تعداد زیادہ تھی۔

جناح اسپتال کے سربراہ نے شہریوں سے درخواست کی ہے کہ وہ ٹھنڈی جگہوں پر قیام کریں اور ٹھنڈے مشروبات کا استعمال کریں گھروں سے باہر نکلتے وقت تولیہ یا کوئی کپڑا گیلا کر کے سر پر رکھیں۔