کراچی میں اسٹریٹ کرائم میں دو سال کی بچی کا باپ جاں بحق

کراچی میں اسٹریٹ کرائم کے ایک اور واقعے میں منگل کی رات بندرگاہی شہر میں ڈکیتی مزاحمت پر مسلح ڈاکوؤں نے ایک شخص کو قتل کردیا۔

پولیس کے مطابق واقعہ اس وقت پیش آیا جب مقتول عمران اپنے دوست کے ساتھ شہر کے نیو کراچی انڈسٹریل ایریا میں اپنے گھر کے باہر اپنا نیا فون سیٹ کر رہا تھا۔

پولیس نے بتایا کہ ڈاکو کچھ مزاحمت کرنے پر عمران کو قتل کرنے کے بعد اس کا نیا اسمارٹ فون لے گئے۔ قانون نافذ کرنے والے اداروں نے بتایا کہ مقتول ایک گارمنٹس فیکٹری میں ملازم اور دو سالہ بیٹی کا باپ تھا۔

مقتول کے اہل خانہ کا کہنا تھا کہ عمران نے واقعے سے ایک روز قبل نیا موبائل فون خریدا تھا۔ اسٹریٹ کرائمز میں اضافے نے کراچی کے شہریوں میں خوف اور عدم تحفظ کو جنم دیا ہے، کیونکہ ڈاکو بلاامتیاز جرائم کرتے رہتے ہیں۔

کراچی میں رواں سال کے پہلے چھ ماہ میں ڈکیتی کی وارداتوں میں مزاحمت پر ڈاکوؤں کے ہاتھوں 80 کے قریب افراد ہلاک ہوچکے ہیں۔ ان واقعات نے شہر کی امن و امان کی صورتحال کے بارے میں تشویش پیدا کر دی ہے، بہت سے لوگوں نے ایسے جرائم کی روک تھام کے لیے حفاظتی اقدامات میں اضافے کا مطالبہ کیا ہے۔

دوسری جانب وزیر داخلہ سندھ ضیاء الحسن لنجار نے اعلان کیا ہے کہ اگر کراچی میں ڈکیتی کی واردات میں کوئی شہری جان سے ہاتھ دھو بیٹھا تو تھانے کے ایس ایچ او کو معطل کر دیں گے۔