لیبیا کے قریب تارکینِ وطن کی کشتی ڈوب گئی، 55 افراد ہلاک

طرابلس: لیبیا کے ساحل کے قریب تارکینِ وطن کی کشتی ڈوب گئی ہے۔انٹرنیشنل آرگنائزیشن آف مائیگریشن کے مطابق ڈوبنے والی کشتی میں 2 بچوں سمیت 55 تارکینِ وطن ہلاک یا لاپتہ ہو گئے ۔

یہ کشتی 6 فروری کو لیبیا کے ساحلی شہر زوارہ کے شمال میں حادثے کا شکار ہوئی۔لیبیائی حکام کے مطابق ڈوبنے والی کشتی میں سوار تارکینِ وطن کی تلاش اور بچا ئوکے لیے کی جانے والی کارروائی میں صرف نائجیریا سے تعلق رکھنے والی 2 خواتین کو زندہ بچایا جا سکا۔

ایک خاتون نے بتایا کہ اس حادثے میں اس کے شوہر کی جان چلی گئی، جبکہ دوسری خاتون نے اپنے 2 بچوں کی ہلاکت کی تصدیق کی۔

زندہ بچ جانے والی خواتین کے مطابق افریقی ممالک سے تعلق رکھنے والے تارکینِ وطن اور پناہ گزینوں کو لے جانے والی یہ کشتی 5 فروری کی رات تقریبا 11 بجے لیبیا کے شہر الزاویہ سے روانہ ہوئی تھی، تقریبا 6 گھنٹے بعد کشتی میں پانی بھرنے لگا، جس کے باعث وہ الٹ گئی۔