کراچی میں ایک اور نوجوان ڈکیتی مزاحمت پر جاں بحق، مجموعی تعداد 81 ہوگئی

شہر قائد کا ایک اور بدقسمت شہری ڈکیتوں کے نرغے میں آکر اپنی قیمتی زندگی سے محروم ہوگیا۔

گلستان جوہر بلاک 9 دبئی ہاؤس کے قریب مسلح افراد نے مقتول شہری سے لوٹ مار کی، جس پر اس نے سارا سامان دے دیا تب بھی جاتے ہوئے اسے دو گولیاں مار دی گئیں۔

پولیس کے مطابق مقتول کی لاش کو ضابطے کی کارروائی کیلیے جناح اسپتال منتقل کیا گیا، جہاں اسکی شناخت 27 سالہ نعمان کے نام سے ہوئی۔

نوجوان موت کی خبر اہل خانہ پر پہاڑ کی طرح ٹوٹ کر گری اور وہ شدت غم سے نڈھال ہوگئے۔ واضح رہے کہ شہر میں رواں سال کے دوران اب تک ڈکیتی مزاحمت پر زندگی سے محروم ہونے والوں کی تعداد 81 تک پہنچ چکی ہے جبکہ درجنوں ایسے بھی کیسز ہوئے جنہیں پولیس نے عینی شاہدین کے دعوؤں کے برعکس ذاتی یا خاندانی دشمنی کا نام دیا ہے