لاش کی شناخت کے بعد مصطفی عامر کی نماز جنازہ کا اعلان

عدالتی حکم پر دو روز قبل قبر کشائی کے دوران ڈی این اے کی رپورٹ آنے کے بعد مصطفیٰ کے والد نے نماز جنازہ اور تدفین کا اعلان کردیا۔

تفصیلات کے مطابق عدالتی حکم پر میڈیکل بورڈ نے مجسٹریٹ کی موجودگی میں لاوارث قرار دے کر دفن کی گئی لاش کی قبر کشائی کر کے ڈی این اے کے 11 نمونے حاصل کیے تھے۔

فرانزک لیب سے موصول ہونے والی رپورٹ کے مطابق حب سے ملنے اور پھر لاوارث قرار دے کر دفن کی گئی لاش مصطفیٰ کی ہے۔

قبر کشائی کے بعد ڈی این اے رپورٹ تک مصطفیٰ کی لاش کو ایدھی ہوم منتقل کردیا گیا تھا۔ اب رپورٹ میں تصدیق کے بعد مصطفیٰ کے والد نے نماز جنازہ کے حوالے سے اعلان کردیا۔

انہوں نے بتایا کہ مصطفیٰ کی نماز جنازہ ڈیفنس فیز 6 علی مسجد میں ادا کی جائے گی جبکہ تدفین فیز 8 کے قبرستان میں ہوگی۔