لیاری رہائشی عمارت منہدم ہونے کے واقعے میں 27 اموات کی تصدیق، ریسکیو آپریشن جاری

شہر قائد کے علاقے لیاری میں پانچ منزلہ رہائشی عمارت منہدم ہونے اور ریسکیو کام میں تاخیر کے باعث اموات کی تعداد 27 ہوگئی، مرنے والوں میں ہندو برادری کے 16 افراد شامل ہیں، ملبے سے 22 افراد کی لاشیں نکالی گئیں جبکہ ایک خاتون دوران علاج دم توڑ گئیں۔

لیاری کے علاقے بغدادی میں گزشتہ روز صبح 10 بج کر 35 منٹ کے قریب پانچ منزلہ رہائشی عمارت زمین بوس ہوئی جس کی 10 بج کر 50 منٹ پر اطلاع کنٹرول روم ریسکیو 1122 پر موصول ہوئی۔

ریسکیو کا کام دوسرے روز بھی جاری ہے جس میں ریسکیو 1122، ایدھی، الخدمت سمیت دیگر فلاحی تنظیمیں حصہ لے رہی ہیں جبکہ جدید آلات کا استعمال کیا جارہا ہے۔

علاقہ مکینوں نے اپنی مدد آپ کے تحت امداد کام سرانجام دیے اور الزام عائد کیا کہ ڈیڑھ گھنٹے تک ریسکیو کے ادارے وقوعہ پر نہیں پہنچے جس کی وجہ سے اموات ہوئی ہیں۔

عینی شاہ نے بتایا کہ 80 گزر کے پلاٹ پر پانچ منزلہ عمارت فلیٹ سسٹم کے تحت تعمیر کر کے فروخت کی گئی جس میں انتہائی ناقص تعمیراتی میٹریل استعمال ہوا اور یہی عمارت کے منہدم ہونے کی وجہ بنا ہے۔ 

خود کو پڑوسی ظاہر کرنے والے سلمان کا کہنا ہے کہ بلڈر سے مکینوں نے متعدد بار اپنے تحفظات کا اظہار کیا جس پر وہ ہر بار گھماتا رہا اور گزشتہ کئی ماہ سے وہ بھاگ  گیا ہے۔

ریسکیو حکام کے مطابق ملبے میں کئی افراد پھنسے ہوئے ہیں جس کی وجہ سے اموات میں اضافے کا امکان ہے جبکہ اب تک 8 زخمی اور 7 لاشیں نکالی جاچکی ہیں۔

جائے وقوعہ پر سب سے پہلے ایدھی کے رضاکار پہنچے اور پھر 1122 ، چھیپا سمیت دیگر فلاحی ادارے پہنچے۔

دوسری جانب وزیر بلدیات سندھ نے حادثے کا نوٹس لیتے ہوئے اعلیٰ سطح پر کمیٹی تشکیل دینے کا اعلان کیا ہے جس کو تین روز میں رپورٹ پیش کرنے اور واقعے کے تعین کے ساتھ ذمہ داران کی نشاندہی کی ہدایت بھی کی گئی ہے۔