ملیر ہالٹ واقعہ، حادثے میں بچے کی موت چوٹ لگنے سے ہوئی، عینی شاہد

شہر قائد کے علاقے ملیر ہالٹ میں جاں بحق ہونے والے میاں بیوی اور نوزائیدہ بچے کی نماز جنازہ ادا کردی گئی۔

حادثے کے بعد نوزائیدہ بچے کو بچانے کیلیے اسپتال لے کر بھاگنے والے مشکور خان نے ڈائیلاگ پاکستان سے بات کی۔

انہوں نے بتایا کہ وہ اپنی اہلیہ کو اسپتال سے دکھا کر اسپتال جارہے تھے کہ اس دوران اہلیہ نے ٹینکر کی نشاندہی کی جو گاڑیوں کو روندتا ہوا دوسری سڑک پر جارہا تھا۔

انہوں نے بتایا کہ میں ایک منٹ کے اندر حادثے کے مقام پر پہنچا تو بچے کی سانس چل رہی تھی، وہاں موجود ایک خاتون نے ناٹ کاٹی جس کے بعد میں اور ایک شہری اُسے اسپتال لے کر بھاگے کیونکہ بچے کی سانس آرہی تھی۔

مشکور کے مطابق اسپتال میں بچے کی سانس آئی مگر پھر وہ انتقال کرگیا، ڈاکٹرز نے بتایا کہ حادثے کے دوران بچے کے سر پر چوٹ لگی ہے۔