منشیات کا کاروبار چلانے کے الزام میں ارمغان کا والد گرفتار

کراچی پولیس کے اینٹی وائلنٹ کرائم سیل (اے وی سی سی) نے منشیات کی اسمگلنگ میں ملوث ہونے کے الزام میں ارمغان کے والد کامران اصغر قریشی کو ان کے گھر سے گرفتار کر لیا۔

 ایک اہلکار نے بتایا کہ اینٹی وائلنٹ کرائم سیل کے سینئر سپرنٹنڈنٹ پولیس (ایس ایس پی) انیل حیدر نے گرفتاری کی تصدیق کرتے ہوئے کہا کہ مصطفیٰ عامر قتل کیس میں مرکزی ملزم کے والد کامران قریشی کو کراچی کے ڈی ایچ اے فیز پنجم، خیابانِ مومن میں واقع ان کے رہائشی مکان سے گرفتار کیا گیا۔

انہوں نے مزید کہا کہ کامران پر شہر میں منشیات کا کاروبار چلانے کا شبہ ہے اور اے وی سی سی پولیس کی جانب سے ان کے گھر پر چھاپے کے نتیجے میں انہیں حراست میں لیا گیا۔ اس سے قبل، مصطفیٰ عامر قتل کیس کے اسپیشل پبلک پروسیکیوٹر نے پولیس کو ہدایت کی تھی کہ وہ ارمغان کے والد کامران قریشی کی تحقیقات کریں اور ان کا کرمنل ریکارڈ چیک کریں۔

پروسیکیوٹر نے ہدایت کی کہ ارمغان، مصطفیٰ اور ان کی والدہ کے موبائل فون کو کیس کی پراپرٹی کا حصہ بنایا جائے۔ 

ملزم اور متوفی کے بینک اکاؤنٹس، فون ڈیٹا، اور سفر کی تاریخ بھی حاصل کی جائے۔ ہدایات میں اسپیشل پبلک پروسیکیوٹر نے یہ بھی کہا کہ ہب میں درج کیس کو کراچی منتقل کرنے کے لیے ایس ایس پی ہب کو لکھے گئے خط کا مقصد بھی بتایا جائے۔

5 مارچ کو، فیڈرل انویسٹی گیشن ایجنسی (ایف آئی اے) اور اینٹی منی لانڈرنگ سیل کی ایک ٹیم مصطفیٰ قتل کیس میں مرکزی ملزم ارمغان کے گھر پہنچی تھی، لیکن گھر بند ہونے کی وجہ سے وہ کامیابی حاصل کیے بغیر واپس لوٹ گئی۔