مون سون بارشیں، کراچی میں اسکول بند رکھنے کا اعلان

مون سون کی بارشوں کے پیش نظر کراچی کے ایک ضلع اور حیدرآباد میں تعلیمی ادارے بند رکھنے کا اعلان کردیا گیا ہے۔

تفصیلات کے مطابق کراچی میں مون سون بارشوں کے پیش نظر ضلع وسطی کے تمام تعلیمی ادارے 29 اگست کو بند رہیں گے۔ کراچی  ڈویژن میں مون سون کی آنے والی شدید بارشوں کے پیش نظر  ضلعی انتظامیہ سینٹرل کراچی نے محکمہ اسکول ایجوکیشن اینڈ لٹریسی، حکومت سندھ کے مشورے پر اعلان کرتے ہوئے نوٹیفکیشن بھی جاری کیا۔

نوٹی فکیشن کے مطابق جمعرات 29 اگست 2024 کو عام تعطیل کے طور پر ضلع وسطی کے تمام تعلیمی ادارے (سرکاری/نجی) بند رہیں گے۔

دریں اثناء حیدرآباد ضلع کے تمام نجی و سرکاری تعلیمی ادارے کل بند رہیں گے۔  ڈپٹی کمشنر کی جانب سے کہا گیا ہے کہ تعطیل کا اعلان مون سون کی بارشوں کے پیش نظر کیا گیا ہے۔