شہری کو سرعام تشدد کا نشانہ بنانے والے ملزمان گرفتار

لاہور میں شہری کو سرعام اسلحے کے زور پر تشدد کا نشانہ بنانے اور ہراساں کرنے والے ملزمان کی ویڈیو وائرل ہونے پر پولیس نے بروقت ایکشن کر کے ملزمان کو گرفتار کرلیا۔

لاہور پولیس نے دھرم پورہ بیجنگ انڈر پاس پر شہری کو تشدد کا نشانہ بنانے اور فائرنگ کرنے والے افراد کو گرفتار کرلیا۔

واقعے میں عمران نامی شہری کو بدترین تشدد کا نشانہ بنایا گیا جبکہ سرعام فائرنگ کر کے لوگوں کو ہراساں کیا گیا تھا۔

ڈی آئی جی آپریشنز فیصل کامران نے واقعہ کا نوٹس لیتے ہوئے ایک خصوصی ٹیم تشکیل دی، جس نے مختصر وقت میں ملزمان کو گرفتار کر لیا۔

ڈی آئی جی آپریشنز نے کہا کہ واقعہ میں ملوث باقی ملزمان کو بھی جلد گرفتار کر لیا جائے گا۔ قانون سے بالاتر کوئی نہیں ہے اور جو بھی قانون اپنے ہاتھ میں لے گا، اسے جیل کی سزا دی جائے گی۔

واقعے کے بعد پولیس نے گارڈ فراہم کرنے والی سیکورٹی کمپنی کے خلاف بھی کارروائی کا آغاز کر دیا۔

ڈی آئی جی آپریشنز نے کہا کہ سیکورٹی کمپنی کی جانب سے لاپرواہی اور ناقص نگرانی کے باعث ایسے واقعات رونما ہوتے ہیں، اس لیے ان کے خلاف بھی سخت اقدامات اٹھائے جائیں گے۔

پولیس کے مطابق، ملزمان کا تعلق ایک مجرمانہ گروہ سے ہے جو شہر میں ایسے واقعات کر کے لوگوں کو ڈرانے دھمکانے کا کام کرتا تھا۔ گرفتار ملزمان سے تفتیش جاری ہے اور ان کے دیگر ساتھیوں کو بھی جلد گرفتار کر لیا جائے گا۔ لاہور پولیس کی جانب سے یہ کارروائی شہر میں امن و امان قائم رکھنے کے عزم کا اظہار ہے۔