صوابی میں سفاک بھائی نے تین بہنوں کو قتل کردیا، دو نے چھپ کر جان بچائی

خیبرپختونخوا کے ضلع صوابی میں بھائی نے فائرنگ کر کے اپنی تین سگی بہنوں کو قتل کردیا جبکہ گھر میں موجود دو بہنوں نے چھپ کر جان بچائی۔

پولیس کے مطابق واقعہ صوابی کے علاقے تھانہ زیدہ کے علاقے میں پیش آیا، ملزم قتل کے بعد موقع سے فرار ہوگیا جس کی گرفتاری کیلیے پولیس چھاپے ماررہی ہے۔

ابتدائی اطلاعات کے مطابق مقتول لڑکیوں کی عمریں 18 سے 24 سال کے درمیان تھیں جب کہ گھر میں موجود دیگر 2 بہنوں نے چھپ کر اپنی جان بچائی۔ پولیس کے مطابق ایک بہن کی حال ہی میں منگنی ہوئی تھی، جس پر ملزم کو رنج تھا جب کہ ان کی والدہ کا انتقال ہو چکا ہے اور والد ساتھ ہی رہتے ہیں۔ 

مقتول بہنوں کا ایک بھائی دبئی میں مقیم ہے۔ واقعے کے بعد تینوں لڑکیوں کی لاشیں باچا خان اسپتال منتقل کردی گئی ہیں۔ پولیس نے جائے وقوع سے شواہد جمع کرنے کے ساتھ قاتل کی تلاش کے لیے چھاپے مارنا شروع کردیے ہیں۔