پاکستان کو کھیلوں کے ایک اور انٹرنیشنل ایونٹ کی میزبانی مل گئی

اسلام آباد: سیف انڈر 17 بوائز فٹبال چیمپئن شپ 2026 کی میزبانی پاکستان کو مل گئی ہے۔

وزیر دفاع خواجہ آصف نے اس اہم پیش رفت کی تصدیق کرتے ہوئے  بتایا کہ پاکستان اگست 2026 میں اس بین الاقوامی فٹبال ایونٹ کی میزبانی کرے گا، جو ملک میں فٹبال کے فروغ کے لیے ایک سنگ میل ثابت ہوگا۔

خواجہ آصف نے کہا کہ سیف انڈر 17 بوائز فٹبال چیمپئن شپ کا پاکستان میں انعقاد پاکستان فٹبال فیڈریشن کی ایک بڑی کامیابی ہے۔

ان کے مطابق یہ ایونٹ نہ صرف پاکستان کے مثبت تشخص کو اجاگر کرے گا بلکہ نوجوان کھلاڑیوں کو بین الاقوامی معیار کی فٹبال کھیلنے کا موقع بھی فراہم کرے گا۔

ذرائع کے مطابق سیف انڈر 17 بوائز فٹبال چیمپئن شپ میں مختلف ممالک کی ٹیمیں شرکت کریں گی جن میں روایتی حریف ٹیموں کے درمیان دلچسپ مقابلے متوقع ہیں۔

اس ایونٹ کے دوران ملک بھر میں فٹبال شائقین کو اعلیٰ معیار کے میچز دیکھنے کا موقع ملے گا۔پاکستان فٹبال فیڈریشن کے حکام نے اس کامیابی پر اطمینان کا اظہار کرتے ہوئے کہا کہ چیمپئن شپ کی میزبانی کے لیے تمام انتظامات بین الاقوامی معیار کے مطابق کیے جائیں گے۔

انہوں نے کہا کہ اس ایونٹ سے پاکستان میں فٹبال کے ڈھانچے کو مضبوط بنانے اور نوجوان ٹیلنٹ کو آگے لانے میں مدد ملے گی۔

ماہرین کے مطابق سیف انڈر 17 فٹبال چیمپئن شپ 2026 کی میزبانی سے پاکستان میں کھیلوں کو فروغ ملے گا اور عالمی سطح پر پاکستان کا مثبت امیج مزید بہتر ہوگا۔