شوہر سے تعلقات کیوں خراب ہوئے؟ عماد وسیم کی اہلیہ نے بڑا انکشاف کردیا

کراچی: پاکستانی کرکٹ ٹیم کے سابق آل راؤنڈر عماد وسیم کی اہلیہ ثانیہ اشفاق نے شوہر سے تعلق پر بیان جاری کیا ہے۔

سوشل میڈیا اکاؤنٹ سے ثانیہ اشفاق نے ایک پوسٹ شیئر کی جس میں اُن کا کہنا تھا کہ میرا گھر اجاڑا گیا، میرے بچے اپنے والد سے محروم ہوئے اور پانچ ماہ کے بچے کو اس کے والد نے اب تک نہیں تھاما۔

انہوں نے کہا کہ شادی میں کچھ مشکلات رہیں مگر تعلق پھر بھی قائم رہا، بطور بیوی اورماں رشتے کو نبھانے کی پوری کوشش کرتی رہی لیکن معاملات اس وقت تلخ ہوئے جب ایک تیسری شخصیت ہمارے درمیان حائل ہوئی۔

ثانیہ اشفاق نے انکشاف کیا کہ وہ خاتون میرے شوہر سے شادی کی خواہشمند تھی، بچوں کے مستقبل اور گھر کے وقار کی خاطر ذہنی اذیت اور تلخ رویہ برداشت کیا، جو مجھے خاموش رہنے کا کہہ رہے ہیں ، ان سے کہوں گی کہ انصاف ضرورہوگا، اس پورے معاملے میں ہر بات کا دستاویزی ثبوت موجود ہے۔

جو دھمکی دے رہے ہیں کہ دستاویزات پبلک نہ کروں، ان سے قانونی طور پر نمٹا جائے گا، میں بدلے کیلئے نہیں،اپنے اور بچوں کیلئے سچ بول رہی ہوں اور ہر اس خاتون کیلئے بول رہی ہوں جس کو خاموش رہنے کے لئے کہا جاتا ہے۔

واضح رہے عماد وسیم کا بیان سامنے آیا تھا جس میں اُن کا کہنا تھا کہ کافی سوچ بچار کی، میرے اور اہلیہ کے درمیان کچھ برسوں سے اختلافات حل نہ ہوسکے اس لیے اب میں نے طلاق کے لیے کیس دائر کردیا ہے۔