سلمان علی آغا کی بیٹنگ اور حسن علی کی تباہ کن بولنگ، پاکستان کا فاتحانہ آغاز

پاکستان نے سلمان علی آغا کی شاندار بیٹنگ اور حسن علی کی تباہ کن بولنگ کے باعث ٹی 20 سیریز کے پہلے میچ میں بنگلادیش کو شکست دے کر فاتحانہ آغاز کردیا۔

لاہور کے قذافی اسٹیڈیم میں کھیلے گئے سیریز کے پہلے ٹی 20 میچ میں پاکستان نے بنگلادیش کو 37 رنز سے باآسانی شکست دے کر پہلی فتح حاصل کی۔

پاکستان کی جانب سے سلمان علی آغا نے سب سے زیادہ 56 رنز بنائے جبکہ حسن علی نے پانچ وکٹیں لیں۔

پاکستان نے پہلے بیٹنگ کرتے ہوئے مقررہ 7 اوورز میں 201 رنز بنائے اور بنگلادیش کو 202 رنز کا ہدف دیا تھا۔ کپتان سلمان علی آغا 56 رنز کے ساتھ نمایاں بلے باز رہے جبکہ حسن نواز نے 44 اور شاداب خان نے 48 رنز کی شاندار اننگز کھیلی۔

بنگلادیش کے شرف السلام نے دو جبکہ باقی بولرز نے ایک ایک وکٹ حاصل کی۔

ہدف کے تعاقب میں بنگلادیش کی جانب سے سب سے زیادہ 48 رنز لٹن داس نے بنائے جبکہ 7 کھلاڑی ڈبل فیگر میں بھی داخل نہ ہوسکے، بنگلادیش کی ٹیم 19.2 اوورز میں 164 رنز بناکر ڈھیر ہوگئی۔

پاکستان کی جانب سے حسن علی نے 5، شاداب خان نے 2 جبکہ فہیم اشرف، خوشدل شاہ اور سلمان آغا نے ایک ایک وکٹ حاصل کی۔