بھارتی چینلز ہیک، نشریات کے دوران پاکستانی ترانہ چل گیا

بھارت کے دو ٹی وی نیوز چینلز کی نشریات میں مبینہ سائبر حملے کے باعث خلل آنے کا دعویٰ سامنے آیا ہے۔ یہ واقعہ بھارتی صدر کے ٹیلی ویژن پر نشر ہونے والے خطاب کے دوران پیش آنے کی اطلاعات ہیں۔

سوشل میڈیا اور مختلف پیغام رسانی پلیٹ فارمز پر گردش کرنے والی رپورٹس کے مطابق ٹی وی 9 تیلگو اور فریڈم ٹی وی کنڑ کے نشریاتی نظام کو مبینہ طور پر نامعلوم ہیکرز نے نشانہ بنایا۔

دعویٰ کیا جا رہا ہے کہ ٹی وی 9 تیلگو کی نشریات کے دوران کچھ وقت کے لیے پاکستان کا قومی ترانہ نشر ہوا، جبکہ مبینہ طور پر ایک پیغام بھی دکھایا گیا جس میں بھارت کو پاکستان کے معاملات میں مداخلت سے خبردار کیا گیا۔

تاہم ان دعوؤں کی آزاد ذرائع سے تصدیق نہیں ہو سکی۔ ہیکرز کی شناخت، حملے کی نوعیت اور نشریاتی نظام کو پہنچنے والے نقصان کے حوالے سے بھی سرکاری طور پر کوئی تصدیق سامنے نہیں آئی۔

بھارتی حکام اور دونوں ٹی وی چینلز کی جانب سے تاحال مبینہ سائبر حملے سے متعلق کوئی باضابطہ بیان جاری نہیں کیا گیا۔ واقعے کے بعد سوشل میڈیا پر مختلف ویڈیوز اور دعوے گردش کرتے رہے، تاہم ان کی حقیقت کی بھی تصدیق نہیں ہو سکی۔