بنیان مرصوص ، پاکستان نے جنگ جیت لی, امریکی اخبار

نیویارک: معروف امریکی اخبار نیویارک ٹائمز نے پاکستانی مسلح افواج کے آپریشن بنیان مرصوص آپریشن کو بھارت کے خلاف ایک بڑی فوجی کامیابی قرار دے دیا ہے۔  

نیویارک ٹائمز میں شائع ہونے والے ایک تفصیلی مضمون میں کہا گیا ہے کہ "پاکستان طویل عرصے سے سیاسی، معاشی اور سلامتی کے بحرانوں کا شکار تھا، لیکن بھارتی جارحیت کے خلاف آپریشن بنیان مرصوص میں حاصل ہونے والی شاندار فتح نے یکایک صورتحال بدل دی۔"  

اخبار نے لکھا کہ "بھارت کے ساتھ فوجی تصادم میں پاکستان کی کامیابی نے نہ صرف مسلح افواج کے وقار میں اضافہ کیا بلکہ ملک بھر میں فوج کے حق میں عوامی جذبات کو بھی ابھارا۔ پاکستانی شہریوں کا کہنا ہے کہ انہیں محسوس ہوتا ہے کہ انہوں نے کچھ بڑا حاصل کر لیا ہے۔"  

مضمون میں مزید کہا گیا کہ "بھارت نے پہلگام جعلی حملے کا الزام پاکستان پر لگا کر جارحیت کا آغاز کیا تھا، لیکن پاک فوج نے منہ توڑ جواب دیا اور پھر بڑی جنگ سے بچنے کے لیے بھارتی سیز فائر کی پیشکش کو قبول کر لیا۔"  

نیویارک ٹائمز نے پاک فضائیہ کی کارکردگی کو سراہتے ہوئے لکھا کہ "آپریشن بنیان مرصوص کے دوران پاکستانی لڑاکا طیاروں نے بھارتی فضائیہ کو زبردست جواب دیا اور ان کے دو لڑاکا طیارے گرائے، جس نے دنیا کو حیران کر دیا۔"  

اخبار نے جنرل سید عاصم منیر کی قیادت کو بھی خراج تحسین پیش کیا اور لکھا کہ "بھارتی جارحیت کے خلاف کامیاب کارروائی کے بعد جنرل عاصم منیر قومی ہیرو کے طور پر ابھرے ہیں۔ ایسی فوجی کامیابیاں افواج کی پیشہ ورانہ صلاحیتوں کو مزید مضبوط بناتی ہیں۔"  

دفاعی ماہرین کا کہنا ہے کہ نیویارک ٹائمز کا یہ مضمون اس بات کا واضح ثبوت ہے کہ پاکستانی مسلح افواج نے انتہائی پیشہ ورانہ انداز میں بھارتی جارحیت کا جواب دیا۔ ان کا کہنا تھا کہ "یہ مضمون ثابت کرتا ہے کہ پاک فوج نے جو کچھ کیا وہ محض دفاعی نوعیت کا تھا اور آپریشن بنیان مرصوص کی کامیابی کا سہرا ہماری اعلیٰ فوجی قیادت کے سر جاتا ہے۔"