برطانیہ میں تراویح پڑھ کر نکلنے والے نمازیوں پر مسجد کے سامنے چاقو حملہ، پاکستانی نوجوان شہید

برطانیہ کے شہر برمنگھم میں چاقو کے حملے کے نتیجے میں 18 سالہ برطانوی نژاد پاکستانی نوجوان جاں بحق ہو گیا، جبکہ دو دیگر افراد زخمی ہو گئے۔

پولیس کے مطابق واقعہ جمعے کی رات نمازِ تراویح کے دوران اولڈبری جامع مسجد کی پارکنگ میں پیش آیا۔ اطلاع ملتے ہی پولیس اور امدادی ٹیمیں فوری طور پر جائے وقوعہ پر پہنچ گئیں اور زخمیوں کو اسپتال منتقل کیا گیا۔

حکام کا کہنا ہے کہ حملے میں 19 اور 22 سال کے دو نوجوان زخمی ہوئے ہیں جن کی حالت کے بارے میں فوری طور پر تفصیلات جاری نہیں کی گئیں۔ 

تاہم 18 سالہ نوجوان زخموں کی تاب نہ لاتے ہوئے دم توڑ گیا۔ مقتول کی شناخت ابھی ظاہر نہیں کی گئی۔

ویسٹ مڈلینڈ پولیس نے واقعے کو قتل قرار دیتے ہوئے تحقیقات شروع کر دی ہیں۔ پولیس نے عینی شاہدین اور علاقے میں موجود افراد سے اپیل کی ہے کہ اگر ان کے پاس کوئی معلومات ہوں تو فوری طور پر حکام سے رابطہ کریں تاکہ ملزمان کو قانون کے کٹہرے میں لایا جا سکے۔