افغانستان میں اسلام قبول کرنے والے آسٹریلوی شہری انتقال کرگئے

افغانستان میں امارات اسلامیہ کی حکومت میں اسلام قبول کرنے والے آسٹریلوی شہری جبرائیل عمر 54 برس کی عمر میں انتقال کرگئے۔

امریکا نے کیون کنگ اور آسٹریلیا کے ٹیموتھی ویکس کو انس حقانی اور دیگر تین ساتھیوں کے تبادلے میں رہا کیا تھا۔

ٹیموتھی ویکس نے دوران قید اسلام قبول کر کے اپنا نام جبرائیل عمر رکھ لیا تھا۔ امارات اسلامیہ کی حکومت کے قیام کے بعد 2022 میں جبرائیل عمر کابل آگئے تھے اور افغانستان میں انگریزی کے استاد کے طور پر خدمات انجام دے رہے تھے۔

اُن کا انتقال کابل میں 8 جنوری کو ہوا جس کی افغان وزارت داخلہ نے تصدیق کی اور بتایا کہ وہ کینسر جیسے موذی مرض میں مبتلا تھے۔

افغان حکومت اور انس حقانی نے جبرائیل عمر کے انتقال پر افسوس کا اظہار کرتے ہوئے مغفرت کی دعا کی ہے۔