لبیک الھم لبیک۔۔ مناسک حج کا آغاز ، لاکھوں عازمین منیٰ پہنچ گئے

منیٰ: دنیا بھر سے لاکھوں حجاج کرام آج منیٰ پہنچ گئے ہیں، جہاں وہ جمعرات کی صبح تک عبادت میں مصروف رہیں گے۔  

حجاج نے اپنے رہائشی مقامات پر احرام باندھا، دو رکعات نفل ادا کیں، اور پھر منیٰ کے لیے روانہ ہوئے۔ یہاں وہ ظہر، عصر، مغرب اور عشاء کی نمازیں جماعت کے ساتھ ادا کریں گے۔  

پھر عازمین 9 ذی الحجہ کو حجاج عرفات کے لیے روانہ ہوں گے، جہاں وہ حج کا اہم ترین رکن "وقوف عرفہ" ادا کریں گے۔ حج کا خطبہ سننے کے بعد، ظہر اور عصر کی نمازیں جمع کر کے ادا کی جائیں گی، اور حجاج غروب آفتاب تک عرفات کے میدان میں رکیں گے۔  

مغرب کی اذان کے بعد حجاج مزدلفہ کے لیے روانہ ہوں گے، جہاں وہ مغرب اور عشاء کی نمازیں جمع کر کے ادا کریں گے۔ مزدلفہ میں وہ شیطان کو کنکریاں مارنے کے لیے پتھر جمع کریں گے اور رات کھلے آسمان کے نیچے گزاریں گے۔  

10 ذی الحجہ کو مزدلفہ میں نماز ادا کرنے کے بعد حجاج جمرات پہنچیں گے، جہاں وہ بڑے شیطان (جمرہ کبریٰ) کو سات کنکریاں مار کر رمی الجمرات کریں گے۔

 اس کے بعد قربانی کی جائے گی اور بال منڈوائے یا کٹوائے جائیں گے، جس سے احرام کی حالت ختم ہو جائے گی۔  

11 ذی الحجہ کو حجاج دوبارہ تینوں جمرات (صغریٰ، وسطیٰ اور کبریٰ) کو کنکریاں ماریں گے۔ اس کے بعد بیت اللہ کا طواف افاضہ کیا جائے گا، جس کے بعد صفا اور مروہ کے درمیان سعی کی جائے گی۔  

12 ذی الحجہ کو غروب آفتاب کے بعد جمرات کو کنکریاں ماری جائیں گی، جبکہ 13 ذی الحجہ کو آخری رمی کے بعد حجاج منیٰ سے اپنے رہائشی مقامات کی طرف روانہ ہو جائیں گے۔ 

مذہبی امور کے ترجمان کے مطابق، سعودی حکومت کی جانب سے پاکستانی حجاج کے لیے 442 بسیں فراہم کی گئی ہیں، جبکہ پاکستان ہاج مشن نے ایک نجی کمپنی سے مزید 510 بسیں حاصل کی ہیں۔  

انہوں نے بتایا کہ 25,861 پاکستانی حجاج بسیں کے ذریعے مشعر الحرام جائیں گے، جبکہ تقریباً 62,000 حجاج ٹرین سروس استعمال کریں گے۔ جمعرات سے حرم تک 4 کلومیٹر کے پیدل راستے کو بھی فعال کر دیا جائے گا۔ پاکستانی حجاج گرینڈ مسجد تک پہنچنے کے لیے سعودی شٹل سروس بھی استعمال کر سکیں گے۔  

)