مسجد الحرام میں اعتکاف کے خواہش مند افراد کے لیے اہم خبر

حرمین شریفین امور کی جنرل اتھارٹی کی جانب سے مسجد الحرام میں اعتکاف کے لیے رجسٹریشن کا اعلان کیا گیا ہے۔

عرب میڈیا کے مطابق جنرل اتھارٹی کا کہنا ہے کہ رجسٹریشن کا آغاز 17 مارچ 2024 (7 رمضان 1445ھ) سے اتھارٹی کے پورٹل اور ویب سائٹ کے ذریعے کیا جائے گا۔

سعودی حکومت کی جانب سے مسجد الحرام میں اعتکاف کے متمنی افراد کے لئے چند شرائط بھی رکھی گئی ہیں، جن کے مطابق 20 رمضان کو مقررہ وقت پر مسجد الحرام میں اعتکاف کیلیے پہنچنا شامل ہے اور معتکف کی عمر 18 سے کم نہیں ہونی چاہئے۔

اتھارٹی کا کہنا ہے کہ مسجد الحرام میں اعتکاف کے خواہش مند فوری طور پر رجسٹریشن کرائیں کیونکہ تعداد مکمل ہونے پر رجسٹریشن بندکردی جائے گی۔

واضح رہے مسجد الحرام اور مسجد نبوی صلی اللہ علیہ وآلہ وسلم انتظامیہ کی جانب سے ہر سال اعتکاف کیلیے رجسٹریشن کا آغاز اور اس کے لیے مختص مقامات کا اعلان کیا جاتا ہے۔ 

دوسری جانب انتظامیہ کی جانب سے ماہ مقدس کے دوران مسجد الحرام اور مسجد نبویؐ آنے والے زائرین کو ماسک پہننے کی ہدایت کی گئی ہے۔