نیویارک میں سکھ رہنما کا قتل، بھارتی شہری نے عدالت میں اعتراف جرم کرلیا

امریکا میں ایک بھارتی شہری نے نیویارک میں سکھ علیحدگی پسند رہنما کے قتل کی ناکام سازش میں ملوث ہونے کا اعتراف کر لیا ہے۔ یہ مقدمہ دنیا بھر میں سکھ رہنماؤں کے خلاف ہونے والی کارروائیوں کے سلسلے کی ایک کڑی قرار دیا جا رہا ہے۔

استغاثہ کے مطابق ملزم نکھل گپتا کو یہ سازش تیار کرنے کے لیے بھارت کے اندر موجود ایک سرکاری اہلکار نے مبینہ طور پر ہائر کیا تھا، تاہم بھارتی حکومت نے ان الزامات کی تردید کی ہے۔

نکھل گپتا نے جمعے کے روز مین ہیٹن کی وفاقی عدالت میں پیش ہو کر اپنے خلاف عائد تینوں الزامات قبول کر لیے۔ پراسیکیوٹرز کے مطابق امریکی وفاقی قوانین کے تحت ملزم کو تقریباً 24 سال تک قید کی سزا ہو سکتی ہے۔

اس سازش کا ہدف گرپتونت سنگھ پنوں تھے، جو نیویارک میں قائم تنظیم ’’سکھس فار جسٹس‘‘ سے وابستہ وکیل ہیں۔ وہ امریکی شہری ہیں اور بھارتی ریاست پنجاب کی آزادی کے حامی سمجھے جاتے ہیں۔

نکھل گپتا، جو بھارت کا رہائشی ہے، کو 2024 میں امریکا منتقل کیا گیا تھا جہاں اس پر قتل کی سازش، کرائے کے قاتل کے انتظام اور دیگر دو سازشی الزامات عائد کیے گئے تھے۔

حکام کے مطابق یہ معاملہ ابھی زیرِ سماعت ہے اور آئندہ دنوں میں مزید تفصیلات سامنے آنے کا امکان ہے۔