قتل کے جھوٹے الزام میں امریکی جیل میں قید بے گناہ شہری 48 سال بعد رہا

امریکی ریاست اوکلاہوما کی جیل میں 48 سال سے قید بے گناہ شہری گلین سیمنز کو چار دہائیوں بعد رہا کردیا گیا۔

گلین سمینز نے جیل میں بے گناہ ہونے کے باوجود مجموعی طور پر 48 سال 1 ماہ اور اٹھارہ دن گزارے اور انہیں اس دوران شدید مشکلات کا سامنا بھی رہا۔

بے گناہ شخص کی 48 برس بعد رہائی ایک صحافی کی وجہ سے ممکن ہوئی جس نے بے گناہی ثابت کرنے میں اہم کردار ادا کیا۔

امریکی میڈیا رپورٹ کے مطابق گلین سمینز کو ڈکیٹی کے دوران وائن شاپ کے کلرک کو قتل کرنے کے الزام میں 1975 میں موت کی سزا سنائی دی گئی تھی۔ بعد میں اس سزا کو عمر قید میں تبدیل کر دیا گیا تھا۔

صحافی علی میئر نے گلین سیمنز کا پہلا انٹرویو 2003 میں کیا تھا اور ان کی کہانی منظر عام پر لے کر آئے تھے، بعد ازاں 2014 میں ایک اور انٹرویو کے بعد یہ معاملہ عدالت کی نظر میں آیا اور پھر اس پر نوٹس بھی ہوا۔

یاد رہے کہ اس وقت بھی گلین سیمنز نے عدالت کو بتایا تھا کہ جس دن ڈکیتی کی واردات ہوئی اس دن ریاست اوکلاہوما میں ہی موجود نہیں تھا۔