ٹرمپ کی نئی خارجہ پالیسی سے سب سے زیادہ فائدے پاکستان نے اٹھایا، امریکی جدیدہ

امریکی جریدے فارن پالیسی نے اپنی تازہ رپورٹ میں کہا ہے کہ صدر ڈونلڈ ٹرمپ کی نئی خارجہ پالیسی کے تحت پاکستان ایک بڑا سفارتی فائدہ حاصل کرنے والا ملک بن کر ابھرا ہے، جبکہ بھارت کو اس پالیسی کا واضح نقصان اٹھانا پڑا ہے۔

رپورٹ کے مطابق صدر ٹرمپ کی دوسری مدتِ صدارت کے آغاز کے بعد پاکستان نے واشنگٹن میں خاموش مگر مؤثر انداز میں اسٹریٹجک واپسی کی ہے، جس کے نتیجے میں دونوں ممالک کے تعلقات میں نمایاں بہتری دیکھنے میں آئی ہے۔ جریدے کا کہنا ہے کہ پاکستان کو امریکہ میں ایسا اعتماد اور براہِ راست رسائی حاصل ہوئی ہے جو بعض قریبی امریکی اتحادیوں کو بھی میسر نہیں۔

فارن پالیسی کے مطابق ایک اہم دہشت گرد رہنما کی گرفتاری میں پاکستان کے کردار نے ٹرمپ انتظامیہ کو فوری سفارتی کامیابی دلائی، جس سے دوطرفہ اعتماد کی بحالی ممکن ہوئی اور واشنگٹن نے ایک بار پھر پاکستان کو قابلِ اعتماد شراکت دار کے طور پر دیکھنا شروع کر دیا۔

رپورٹ میں کہا گیا ہے کہ پاکستان نے صدر ٹرمپ کی ’’ٹرانزیکشنل‘‘ خارجہ پالیسی کو بہتر انداز میں سمجھتے ہوئے عملی اور نتائج پر مبنی سفارت کاری اپنائی۔ اس تعاون میں کرپٹو کرنسی، اہم معدنیات اور تجارت جیسے شعبے شامل ہیں، جہاں ممکنہ معاہدوں پر بات چیت جاری ہے۔

جریدے نے پاک امریکا تعلقات میں بہتری کا کریڈٹ پاکستان کی عسکری قیادت، خصوصاً فیلڈ مارشل عاصم منیر کو بھی دیا ہے۔ رپورٹ کے مطابق صدر ٹرمپ کا پاکستان کی عسکری قیادت کے ساتھ براہِ راست رابطہ اسلام آباد کی واشنگٹن میں پوزیشن کو مضبوط بنانے کا باعث بنا۔ فیلڈ مارشل عاصم منیر اور وزیراعظم شہباز شریف کی اوول آفس میں امریکی وزیر خارجہ مارکو روبیو سے ملاقات کو بھی مثبت پیش رفت قرار دیا گیا۔

دوسری جانب فارن پالیسی نے بھارت کو ٹرمپ کی نظرثانی شدہ خارجہ پالیسی کے ’’نقصان اٹھانے والوں‘‘ میں شامل کیا ہے۔ رپورٹ کے مطابق امریکا اور بھارت کے تعلقات گزشتہ دو دہائیوں کی کم ترین سطح پر پہنچ چکے ہیں، جس کی وجوہات میں بھارت کی تجارتی پالیسیاں، روس سے تیل کی خریداری اور تجارتی معاہدے میں تاخیر شامل ہیں۔

رپورٹ میں مزید کہا گیا ہے کہ بھارتی مصنوعات پر 50 فیصد امریکی ٹیرف بدستور نافذ ہے جبکہ دوطرفہ تجارتی معاہدے کے حوالے سے غیر یقینی صورتحال برقرار ہے۔

فارن پالیسی نے نتیجہ اخذ کیا کہ واشنگٹن میں پاکستان کی بڑھتی ہوئی سفارتی پیش رفت نے خطے میں طاقت کے توازن کو متاثر کیا ہے اور بھارت پر سفارتی دباؤ میں اضافہ ہوا ہے۔