وینزویلا میں کارروائی اور صدر کی گرفتاری کے بعد ٹرمپ کا بڑا انکشاف

امریکی صدر ڈونلڈ ٹرمپ نے وینزویلا کے خلاف کارروائی اور وہاں کی قیادت کو نشانہ بنانے کی تصدیق کر دی ہے۔ صدر ٹرمپ نے سوشل میڈیا پلیٹ فارم “ٹروتھ” پر بیان جاری کرتے ہوئے کہا کہ وینزویلا اور اس کی قیادت کے خلاف ایک مشترکہ آپریشن کیا گیا ہے۔

اپنے بیان میں ٹرمپ نے دعویٰ کیا کہ کارروائی کے دوران وینزویلا کے صدر نکولس مادورو اور ان کی اہلیہ کو حراست میں لے کر ملک سے باہر منتقل کر دیا گیا۔ ان کا کہنا تھا کہ یہ آپریشن امریکی قانون نافذ کرنے والے اداروں کے تعاون سے انجام دیا گیا ہے، جبکہ مزید تفصیلات وہ رات کو پریس کانفرنس میں سامنے لائیں گے۔

دوسری جانب خطے اور دنیا بھر سے اس کارروائی پر شدید ردِعمل سامنے آیا ہے۔ کولمبیا اور کیوبا نے امریکی حملوں کی سخت الفاظ میں مذمت کرتے ہوئے اقوام متحدہ کی سلامتی کونسل کا ہنگامی اجلاس بلانے کا مطالبہ کیا ہے۔

کیوبا کے صدر نے کہا کہ وینزویلا پر کیے گئے امریکی حملے بین الاقوامی قوانین کے منافی اور مجرمانہ اقدام ہیں، جن پر عالمی برادری کو فوری ردِعمل دینا چاہیے۔

اسی طرح روس نے بھی امریکی کارروائی کو عالمی قوانین کی کھلی خلاف ورزی قرار دیتے ہوئے شدید مذمت کی ہے۔

واضح رہے کہ امریکی فورسز نے وینزویلا کے دارالحکومت کاراکاس سمیت مختلف ریاستوں میں فضائی حملے کیے، جن میں فوجی تنصیبات اور وزارتِ دفاع کو نشانہ بنایا گیا۔ کاراکاس میں کم از کم سات زور دار دھماکوں کی آوازیں سنی گئیں، جبکہ شہریوں نے نچلی پرواز کرتے ہوئے امریکی فوجی ہیلی کاپٹر بھی دیکھے، جس کے بعد خطے میں کشیدگی اور جنگ کے خدشات مزید بڑھ گئے ہیں۔